郭富城與國產女友方媛在2017年結婚，婚後生了大女Chantelle和二女Charlotte後，除了工作外，城城幾乎將大部份時間放在家庭上，由以往經常被影到一班好友如張智霖和沈嘉偉等人聚會的相片，變成拖實老婆又或者抱女行街的相片，天王變父王的形象更深入民心！
日前城城又再出動，不過今次城城並非揸跑車，反而改揸白色波子，事關車上除了有「跟得夫人」方媛外，還有外母與及頭號「前世情人」Chantelle！當晚大約7時左右，見到城城揸車離開寓所，當時他以「安全車速」直抵灣仔利東街。泊好車後，城城第一時間行去後座打開車門，但警覺性甚高的城城先周圍望一望，隔了一會兒才示意Chantelle下車，當然城城亦第一時間抱實囡囡，即使外母打算幫手抱孫，但城城亦堅持親力親為。
原來城城打算一家人齊齊食麻辣火鍋，老闆見到VIP城城扶老携幼到場，亦第一時間到門口迎接，但到底女兒的年紀尚小，以往打邊爐隨時用上數小時的城城，今次大約個半小時便離去，臨走前發現有記者影相，他笑笑口叫大家不要影女兒，安頓好女兒後，笑問他會否擔心女兒食麻辣火鍋？他笑說：「邊有呀，冇呀，行吓冇問題嘅！」
採訪、攝影：徐錦池、吳耀輝
| 採訪、攝影：徐錦池、吳耀輝 | | |
| | |
|
鍾意就快D Share啦！
|
|
|
