【頭條獨家】拍住麥包金剛做主持 ViuTV新丁蔡寶欣緊張到爆喊
去年參加ViuTV《廣告女皇》奪得季軍的蔡寶欣（Pony），除了做娛樂新聞《十五分鐘熱度》主持外，最近仲有機會拍住麥包（麥長青）和金剛主持真人騷節目《C9旅行團》，跟兩位前輩同成班師奶去台灣拍外景，Pony坦承超緊張，期間更因自己表現唔好即場爆喊，但兩位前輩反而安慰她，令她相當感動。採訪：杜淑霞
加入ViuTV後，Pony先演出綜藝節目《我食飯你埋單》，以及最近主持《十五分鐘熱度》，今次《C9旅行團》才算正式主持工作，「《我食飯》我只係個助手仔嚟，唔算係主持，而《十五分鐘》就主要係出外景訪問藝人，都唔係正式嘅主持工作，所以知道今次真係負責主持，有呢次機會真係開心又緊張。」
麥包有爸爸feel
Pony覺得緊張除了有機會正式做主持外，當然要面對兩位經驗豐富的前輩亦是主要原因，「知道同麥包、金剛合作，最初真係好緊張，特別係麥包好似有啲嚴肅咁，不過識落佢反而好似爸爸咁好照顧人，喺台灣時我貪玩坐電單車尾，點知畀死氣喉『辣』到起咗個大水泡，收工時佢仲專登陪我去買藥，真係好好人。」
正因為前輩咁照顧，Pony更加想做啲，反而畀自己更大壓力，最終情緒失控爆煲，「我其實每晚返酒店房都有檢討返，但係始終諗唔到點樣可以做好啲，去到中段有日食午飯時，忍唔住行咗去海邊喊，本嚟喊完繼續開工，但係見到麥包佢哋我又忍唔住喊過，又同佢哋道歉自己做得唔好，佢哋冇怪我仲安慰我，之後拍攝更加畀多啲位我發揮，所以真係好多謝佢哋兩個咁照顧同埋體諒，希望嚟緊節目再有續集可以跟佢哋再學嘢。」
來源 source: http://hd.stheadline.com
|
鍾意就快D Share啦！
|
|
|