陳奕迅（Eason）原定今個月初起喺紅館舉行25場跨年「Fear and Dreams」演唱會，不過因近月社會局勢同交通配套等問題影響，主辦機構ESL Ltd喺上個月以無法保證觀眾安全同交通配套下，宣佈取消，影響20萬觀眾。噚日主辦機構喺社交網公佈退票安排，優先訂票同公開發售嘅門票，將分別喺明年3月及4月退款，不過今次退款唔包括信用卡同城市售票網收取嘅手續費。
結果引起購票觀眾不滿，留言怒轟：「點解要等四個月？點解唔退手續費？」、「8蚊一張手續費，你25場，有20萬觀眾，你食咗160萬！嘩！勁過大白象工程」、「門票又冇出又冇寄，憑乜收個32蚊手續費？」等。據了解，手續費係信用卡公司同城市售票網收取，與主辦機構無關，而內部訂票嘅手續費，會全部退回給歌迷會。
撇低徐濠縈
另外，Eason因為演唱會取消，多咗時間可以陪屋企人，日前《蘋果》喺銅鑼灣就撞到佢，當日約下午4點半，見Eason親自揸車去老婆徐濠縈嘅時裝店，不過阿徐一早發現有記者影相，就通知Eason，所以佢揸車去到老婆嘅舖頭附近，未有即時停車。
當Eason準備離開又遇上紅燈，本來記者想上前做訪問，但係Eason笑笑口拉起司機位嘅玻璃窗，趁轉綠燈就踩油離開。而阿徐俾Eason撇低後，就繼續留喺店內。
撰文：馮仁昭
|
鍾意就快D Share啦！
|
|
|