- 【超市購物如官場派錢】陳茂波一百幾十都揸唔定主意 排隊結帳又反悔
- 20分鐘前
陳茂波宣布派錢，18歲以上永久居民人人一萬。不過，點解無咗以前派錢時嘅興奮心情嘅？求其諗，都諗到一堆原因，例如2019年「阿茂派錢四千蚊」煩過鬼。話就話今次可以網上填表，但呢個政府做嘢一向拖泥帶水唔得爽手，自然唔敢奢望咁多。何況無論在公在私，財爺波叔都係個好鬼娿哿嘅人。嗱，無老屈㗎！睇佢喺超市買魚生、壽司就知。
以財爺波叔身份地位，竟然要自己去超市買嘢？認真估唔到佢有貼地一面！一支公拎住購物籃直衝魚生檔位置，熟晒架步應該唔係第一次。睇佢揀魚生時嘅眼神以及專注，唔好俾佢呃到以為佢好有心得呀，其實佢只係舉棋不定咋，前後睇咗勁耐先揀到第一盒。第二、第三盒情況一樣，真係想同佢講聲：「你知不知道？你知不知道？我等到花兒也謝了。」
幾經辛苦用咗十幾二十分鐘，終於有啲斬獲，個籃唔再空寥寥，點知佢轉個頭又擺返低，全部換過晒。換完唔捨得走，繼續睇下有無更加好。 財爺呀財爺！嗰一百幾十嘅魚生都心大心細揸唔定主意，香港庫房由你揸fit，難怪有錢派市民都唔happy啦。何況啲錢本來就係市民所交嘅稅，唔通好似大陸人咁以為啲錢係中央俾咩？而且，派一萬實際又幫到幾多呢？依然係申請唔到公屋又買唔起樓，仲要魔鬼在細節，同警務處獨得近258億嘅預算綑綁式交上立法會(*註1)，你話雞唔雞肋？
*註1：去年警務處向警員發放的津貼金額暴升10倍，由原訂2.5億增至25億，即平均每位警員約得8萬5津貼。至於用來購買催淚彈等彈藥的預算亦增加3倍，由2.1億增加至6.12億。更斥資7500萬買六架裝甲車。 唉，諗起條氣都唔順！講返阿茂波，終於買定離手肯去排隊畀錢，點知排排下又返轉頭擺低啲魚生，唔係又重新揀過嘛？原來，佢嫌多人排隊唔想嘥時間等，決定唔買。
其實當初快手揀定咪唔使用咁多時間囉，就好似當初早啲撤回咪唔使搞到一鑊泡囉，班高官真係在公在私都一鬼樣。最慘係，阿茂波出到街一樣要嘥時間企定定等車，無眼睇！
攝錄：蕭敬漁
----------------------------
【壹週刊 武漢肺炎專頁】
緊貼防疫資訊！口罩訂購情況、確診個案、病徵潛伏期、封關國家名單、保險點賠？
與你遠離瘟疫 睇清官謊！
立即睇
-----------------------------
【壹週刊直播平台 ChannelNEXT】
專家教你自保攻略｜口罩點揀｜防疫點做
立即睇
-----------------------------
疫情追蹤，最新消息，Follow 壹週刊Telegram：
點擊追蹤
來源 source: http://nextplus.nextmedia.com
|
鍾意就快D Share啦！
|
|
|