淡出螢幕26年的吳啟明近年開食肆，揸鑊鏟為食客提供佳餚美食，不過，早前他跳出廚房走入錄音室，孖着唱作歌手雷深如（J.Arie）灌錄英文新歌《I'm Your Child》，此曲是音樂發燒友吳啟明包辦作曲、編曲、填詞和演唱，他更不惜工本斥資6位數字製作，還拍了MV留念（https://bit.ly/2XlGvHI），當中歌詞充滿正能量。
吳啟明1994年息影，離開娛樂圈後，專心鑽研廚藝和音樂。2018年，他創作的歌曲《Falling Down》被去年播出的韓劇《觸及真心》選為片尾曲，機緣巧合下，他認識了不少韓國音樂人，大家不時有交流切磋。身為基督徒的吳啟明，每年特別重視聖誕節和復活節，他去年聖誕曲癮大發，作了一首聖誕歌《This Baby》，並找了J.Arie演唱，兩人在音樂上很合拍，所以今個復活節再添食。
吳啟明除找J.Arie獻聲，更找來跟鄧紫棋（G.E.M）和李玟合作過的美籍鼓手Padget Nanton III、低音結他手Marcus和色士風老師Miles的強大音樂班底，音樂總監是蘇道哲，他們盡情在錄音室內「發燒」，吳啟明也技癢加入唱埋一份。MV的內容索性以音樂會友，拍攝當日，錄音室內充滿歡笑聲。吳啟明首先錄唱個人部份，他稍稍試咪後便投入錄音，唱得好有feel，他事後接受《蘋果》訪問時說：「有feel係因為首歌係我作嘛！」由於他不是唱家班，所以他表示錄音前會做一些開聲的練習。
新歌在甚麼情況下創作出來？「作曲由零開始到變成一首歌，我用咗大約二、三十分鐘完成，有晚半夜我飲醉咗，喺鋼琴旁邊作咗出嚟。」吳啟明馬上找人填詞，想用歌聲獻給主，但看過歌詞不太滿意，最後自己出手，「但改歌開會嗰日，女歌手冇嚟，我自己用咪試唱一次，大家事後竟將我同J.Arie把聲mix埋一齊，佢哋話好夾，所以今次有我份唱。」吳啟明續說：「合唱歌其實大家五五咁分，但今次比例係我三佢七，我把聲會填返佢啲低音位，似和音，成首歌聲量我只佔30%。」
26年後「復出」幕前，吳啟明笑言：「真係歲月催人。」他直認埋位拍攝MV首天有不習慣，「可能人老咗，唔慣四面打燈，眼有啲唔舒服，但都好快適應到，我首歌好短，我同監製商量唔使寫story line，就拍musical。」色士風老師Miles怕疫情只有代吹聲，拍攝吹色士風的畫面由吳啟明負責。吳啟明也包辦填詞，他說：「我唔太識中文，只有填英文歌詞，我最欣賞林夕。」以新歌班底計，製作費最少都要6位數字，他說：「我係完美主義者，煮餸都要買靚料，唔可以觀音頭掃把腳，今次碌盡人情卡同credit卡。」吳啟明大讚J.Arie的靚聲，尤其適合演唱他這首作品的高音部份。
問到56歲吳啟明是否打算由揸鑊鏟轉為揸咪？「有朋友同我講，仲做到就做，否則將來後悔，我諗完決定盡情玩音樂，但我冇才華做歌手，唔揸咪。」吳啟明坦言年輕時曾夢想過做歌手：「我覺得做歌手好有型，而家唔想做，可能係老咗，唔想咁遲先做，但不減我對音樂熱誠。」吳啟明認為現在疫情影響，大家都居家避疫，主要在網上找尋娛樂，新歌會在今日上載YouTube分享。
J.Arie都好開心跟吳啟明合唱，非常興奮獲悉對方給她100分評價的鼓勵，她說：「我哋遇上好奇妙，透過寫歌嘅朋友認識，啟明哥要求好高，佢係完美主義者，而家好少人咁揼本去造歌，我哋平日最多用電腦篤啲音樂出嚟，但佢會請晒真人樂手彈樂器，咁book法真係好甘。」J.Arie表示歌詞中好有愛，可以送給關心的人。
撰文：比華利
攝影：陳俊強
攝錄：馮嘉銘
Produced By：Fruity Nutty Studio
-----------------------------
App內1-Click訂閱《蘋果動新聞》
按此了解更多
來源 source: http://hk.entertainment.appledaily.com
|
鍾意就快D Share啦！
|
|
|