博大眾光顧小店
吳日言昨日在觀塘的新店接受《蘋果》專訪，坦言開舖是計劃之內的事：「拍板嗰陣已經知道有疫情，當時預計有結業潮，於是同業主殺價，呢度舖租都畀咗7折。我覺得疫情下係機會，可能係唇膏效應，大家唔想花費太多去餐廳、高級食肆，就會選擇我哋呢啲小店。」作為商界初哥的吳日言，連環面對抗暴運動及武漢肺炎，她認為社會運動影響不算大，反觀疫情下街上人流驟減，不禁令她憂心：「如果講錢，幾間舖都赤字，但係試下逆境中生存，𠵱家都捱得住嘅話，之後就可以做少奶奶。」除了開分店，她更與員工共度時艱：「所有員工都冇裁，我自己冇人工囉，但係我覺得做老闆係要咁，確保大家個關係，有時唔夠人叫佢哋頂都肯幫我。」
對於演藝界幾近全面停工，吳日言鼓勵大家說：「大家都有自己嘅才能，香港係需要人才嘅。趁呢段時間增值自己、做吓運動，最緊要唔好頹廢落去。」問她有甚麼說話想跟林鄭政府講？吳日言笑說：「粗口嚟，出唔到街喎。其實都冇嘢好講，你快啲走啦，我唔知下個班子會唔會好啲，但係我唔想再見到你啦。」
採訪：盧妹
攝影：仇志德
來源 source: http://hk.entertainment.appledaily.com
|
鍾意就快D Share啦！
|
|
|
