2020年4月17日星期五

【頭條獨家】花店做兼職保生計　陳蕊蕊慳錢捱杯麵 #陳蕊蕊

【頭條獨家】花店做兼職保生計　陳蕊蕊慳錢捱杯麵

暫時冇嘢撈的蕊蕊惟有靠副業保生計，近日她則於朋友的花店做兼職。

新冠肺炎在港爆發至今約兩個半月，對本港經濟及各行各業造成巨大衝擊，圈中不少藝人更苦呻工作量大減，早前陳蕊蕊也自爆兩個月零收入，大部分幕前工作亦紛紛煞停，好似原定本月中公演的舞台劇《戀上12星座》日前都宣佈延期。暫時冇嘢撈的蕊蕊惟有靠副業保生計，據悉近日她於朋友的花店做兼職，日前她就獨自於銅鑼灣街頭覓食，惜蕊蕊連茶餐廳都唔捨得幫襯，最終買Cheap Cheap杯麵醫肚，可謂慳到盡。採訪：譚壹致、黎寶倫

陳蕊蕊於2月底出席公開活動時，已自爆兩個月零收入，她嘆道：「停咗好多工作，尤其係返內地嘅工作都Cut哂，好彩自己都有副業幫補吓。」除了經營網店賣吓護膚、纖體用品外，早於去年報讀插花課程的蕊蕊，原來仲喺朋友間花店做兼職，賺生活費。日前Lunch Hour，穿露肩裝襯短褲仔的蕊蕊獨自現身銅鑼灣街頭覓食，其間，見她在餐廳門前揭Menu，未知是否近50蚊一個Set都嫌貴呢？蕊蕊考慮一輪後都冇幫襯，最終走到隔離的便利店買嘢食，精挑細選約10分鐘，卒之買了一個10蚊有找的杯麵醫肚，認真慳家！

熟手技工

隨後，蕊蕊返回附近的樓上花店開餐，脫下口罩後，她都好乖地消毒完雙手先進食，仲連剩下的湯汁都唔放過，真係好「惜」食！吃飽後，笠上圍裙的蕊蕊便拉出花架、膠桶等工具，到大枱前跟友人一起開工紥花，見她紥得有板有眼，估計已兼職好一段時間，不過每單Job平均賺數百蚊，以現在時勢，相信一個月頂多袋得4位數。被問到靠副業收入夠過活嗎？蕊蕊透過電話回覆：「掹掹緊，始終大家嘅消費慾低咗，網上生意都麻麻哋，而家月入唔過5位數，所以呢兩個月都搣緊積蓄，好在最近出少咗街，用少咗錢。」