2020年4月17日星期五

【頭條獨家】唔怕老公詐型姜麗文猛讚王梓軒大隻好hot #姜麗文 #王梓軒

【頭條獨家】唔怕老公詐型姜麗文猛讚王梓軒大隻好hot

兩人做足一小時運動，輕鬆過關。Lesley更見馬甲線。

近日全球受新冠肺炎疫情影響，不少人響應呼籲盡量留在家中，網上因而出現不少「Challenge」。身在洛杉磯嘅王梓軒(Jonathan)隔空挑戰比他大一歲，現年34歲嘅「索人妻」姜麗文(Lesley)，跟她齊齊運動抗疫，梓軒話：「我同Lesley都係玩開運動，於是我挑戰佢，大家各揀5個動作，亦希望觀眾一齊做。」兩人做到出晒汗，上氣唔接下氣，做足一小時，一啲都唔hea，着住運動褲及運動Bra 的Lesley仲做到擘晒脾，彎晒身，玩得相當投入。其間Lesley仲唔怕老公仔Pakho呷醋，多番大讚梓軒身形好hot好大隻！

鬼妹仔嘅Lesley，中文向來唔多好，運動其間發生唔少笑料，喺做完上半身熱身後，Lesley隨意說：「你做下體熱身」梓軒滴住汗反問：「下體？」Lesley大笑話：「講錯咗，哈哈！我係想講下半身，其實每一個人拉筋嘅system都好唔同。」兩人不時提醒觀眾留意呼吸同飲水，唔可以坐低，梓軒話：「Don't sit down!一坐低個人就會放軟，好難恢復……」過了半小時後，梓軒突然收到IG通知需要收費，梓軒好「豪」咁話：「8蚊我畀！」Lesley拍晒手話：「為咗我哋大眾健康！」

除咗做運動外，兩人更分享近況，梓軒話：「我乖乖留喺屋企做吓運動，同埋度緊新項目，疫情爆發前我係要出去上堂，𠵱家出唔到街改咗online學。」梓軒續指，當地除咗必需品嘅店舖開門，其餘店舖一律停水停電。而Lesley最近除咗拍TVB新劇《踩過界2》外還會去買餸煮飯仔留家抗疫：「呢排都係同老公喺屋企打機，唔見朋友呀！之前有一段時間好down，之後開始睇書，要繼續學多啲嘢……」兩人更推薦多本書籍，Lesley更介紹一本parenting嘅書，為將來教育小朋友作好準備。