受武漢肺炎疫情影響，各行各業都牙痛咁聲。偏偏，吳日言做逆市奇葩，打算為飯糰店生意開新分店，更開始四出物色新舖位。
早前發現吳日言單拖現身，期間不停頭𩓥𩓥四圍望，原來睇緊招租地舖，又拎出電話影低店舖門面及周遭環境，連啲轉角位以及窿窿罅罅都唔放過，專登行埋去望清楚，相當細心。之但係天氣熱返唔少，戴住口罩真係焗到面油溝汗水，令人相當難受，所以就算條街有其他行人，吳日言都唔理得咁多，照樣拉低口罩印印汗唞唞氣。
依家限聚令放寬，但好多人對個市依然唔樂觀，守得住盤生意已經安樂，邊似得吳日言竟然選擇逆市擴張，唔通佢好好生意？「生意影響得慘重，香港無人出街，條街好靜，能夠自己做就自己做，盡量開源節流。生意無咗差不多7成，希望快啲復工復課應該會好一點。」原來生意一樣慘淡，但佢對將來情況有信心，準備開第4間分店，更計畫多開幾間，所以趁租金回落有議價空間，率先擔定櫈仔排頭位租舖仔。
不過，事事親力親為要付出代價，就係犧牲陪伴一歲囡囡嘅時間：「最近忙，忙新舖，左撲右撲，少咗陪囡囡，成日要出舖頭。開始要試有無咩新產品啱舖頭，所以都少咗好多陪囡囡。」
就算難得有時間可以同屋企人外出食餐飯，但都未必食得開心食得安樂，好似早前吳日言與家人到太古城中心準備用膳，咁啱撞正「和你唱」。本來相安無事，直到大批防暴警員到場以「限聚令」為由要求商場內人群離開，令吳日言與家人被迫離開，期間又被防暴鬧，覺得「好滋擾」。
事件令吳日言被「五毛」騷擾，但同時亦令她得到很多港人支持，甚至有時在舖頭現身打點，也會有市民、食客向她打招呼及加油，說要狠狠地「懲罰」佢。重提當日太古城情況，她說：「當刻係激動，因為䒐䒏（忟憎）就要發洩吓，呻完就無嘢啦，係其他人過份激動啫我覺得，有啲人都戥我好唔抵、戥我激動，我自己無咩嘢喇。」
攝錄:吳斯金
----------------------------
壹呼百應 號召有心人 請香港人睇壹週刊
按此了解更多
----------------------------
APP 內訂閱
1Click 搞掂 輕鬆簡便
按此了解更多
-----------------------------
【昔日紙本檔案庫】
30年壹仔經典 壹壹重現！
來源 source: http://nextplus.nextmedia.com
|
鍾意就快D Share啦！
|
|
|