o靚妹李綺雯未成年便加入娛樂圈，17歲參與亞視女優比賽攞冠軍，在亞視4年，大多做主持工作；直至2006年過檔無綫由新人做起，至今拍過超過50部劇集，可惜仍擺脫不了配角命運，眼見其他前亞視藝人田蕊妮、陳煒、陳展鵬、袁文傑等都上位做一姐一哥，o靚妹瞪大眼說：「當年我join亞視嘅女優，都知唔係選靚女，我從來都唔覺自己係一個靚女，所以從來冇諗過做花旦，除非個主角唔需要靚，咁我仲有機。」
雖然不是女主角，但o靚妹總算是「搶手貨」，高峯期試過一年接5、6部劇，她苦笑說：「唔係劇接劇，生活都幾坎坷幾慘！」現年35歲的o靚妹被指是「童顏極限」，但演出從來不受制於外貌，扮學生妹外，殺人犯、高材生、大肚婆、精神病患者等都手到拿來，而她在無綫的最後一部劇集是處境劇《愛．回家之開心速遞》，飾演黑幫大家姐「賀碧雲」，與「大小姐」化敵為友。不過，o靚妹多年來在台慶頒獎禮上連提名都未有過，她一臉失落：「係冇喎，攞獎更難……當年《情越海岸線》演金毛鈴都有啲人留意，同我講話有機會攞『飛躍』，但最後提名都冇，而我都係嗰年（2013年）開始唔簽TVB做經理人，唔知關唔關事。」
o靚妹默默工作，曾獲不少前輩提攜，除張衞健外，與黃光亮亦特別投緣，她說：「亮哥教我好多嘢，睇佢個樣好惡，但個人黑白分明。我份人係遇惡越惡，佢都feel到。我哋又啱傾，記得拍完《火線下的江湖大佬》，本身《果欄中的江嫂》我都有份，但因為我兩個劇撞咗，亮哥好有心同監製講『o靚妹拍我先拍』，仲叫我拆掂佢，但我邊有能力拆，最後都冇拍。」
多年來o靚妹花邊新聞不算多，僅與足球員「陳七」陳肇麒拍過拖，近年再傳與細她9年的「法國小鮮肉」麥凱程拍拖，o靚妹笑住否認，直言不介意姊弟戀：「我唔介意，但都要睇對方介唔介意。」o靚妹自覺是工作狂，平時會放70%在工作上，其餘家人、朋友和情人各佔10%，她解釋：「好多男人會覺得好少，相處上好似我唔愛佢，但我嗰十分一係愛晒！」o靚妹表示家人從來未有催婚，反而曾經有位出軌男前輩勸她退出娛樂圈兼結婚生仔，o靚妹爆seed說：「我離開TVB，有人問係咪結婚，女人好少咁問，多數男人講……同我講呢句說話嘅人，我係好想同佢講：『你老婆嫁咗畀你都唔係好幸福，你咪又出去偷食！』我真係好想同嗰個人講呢句，但嗰個係前輩，我梗係吞咗啦，哈哈哈！」
採訪：嵐山
攝影：林德雄
攝錄：周樂恒、郭賢興
服裝：sparkonlineshop
化妝：joew professional makeup
-----------------------------
App內1-Click訂閱《蘋果動新聞》
按此了解更多
來源 source: http://hk.appledaily.com
|
鍾意就快D Share啦！
|
|
|