2020年5月19日星期二

【神複製】惡搞Dua Lipa運動教學片　Alton＠MIRROR同隊友姣爆勁扭

Alton拉埋班兄弟落水，一齊惡搞Dua Lipa的《Physical》之「Let's Get Physical Work Out」版MV！

疫情下影響幕前工作，近期不少藝人轉型到網上搶「收視」，好似一班歌手衛蘭、林奕匡、許靖韻等，紛紛拍片獻唱娛樂大眾，而不時於YouTube分享打機片的MIRROR成員Alton Wong（王智德）昨日就搞搞新意思，上載了一條以「六分鐘Work Out片原來好辛苦」為題，實情是惡搞英國樂壇新紮天后Dua Lipa的新歌《Physical》之「Let's Get Physical Work Out」版MV的短片！

片中，Alton聯同一班兄弟和美女跟足「原裝正版」着晒80年代復古運動Look，勁跳Warm up dance；抱住「無聊事認真做」的精神，今次影片的製作都好認真，不單止有晒排舞、打燈、道具等，連大家的姣爆表情都99% Copy and paste，有份演出的Anson Kong（江熚生）、Tiger（邱傲然）、Lokman（楊樂文）、Boris（黃浚銘）等更完全拋下偶像包袱，陪住Alton屹籮、狂扭兼發姣，盡顯Wild一面！至於餘下的1%，就要怪反串Dua Lipa的Alton，MV中他頻頻對鏡頭展露「好假的笑容」，喜感十足，其實Alton會唔會考慮過檔做ERROR成員呢？

Alton留言：「六分鐘Work Out片原來好辛苦，唔係講緊Workout，係辛苦在又搬又排又做又演又導又剪又盛咁。搞咁多嘢拍片都係望君一笑，希望大家鐘意、支持吓，或者有咩題材有感都可以留言分享喔。」一眾粉絲睇完條片都爆笑，有網民寫道：「好黐線啊好正啊！點解你哋會諗到扮呢個MV㗎？你哋真係好勁啊！」、「主角睇得又大隻喎，每位都好落力演出，表情同動作都好賣力！120分！霞姨，每人派多2個飯盒」、「好正！你哋個樣愈認真就愈好笑！」、「好姣呀 I love it」、「我到底睇咗啲咩？笑到黐線」等，不少人仲話好想同佢哋瘋狂Work Out，認真搞笑！