14年炒賣iPhone，圖利不成，反而令麥長青（麥包）一身蟻！
事緣他太太當時同朋友合資443萬炒賣iPhone，但疑誤墮騙局，損失金錢之外，更令麥包惹禍上身，不停受滋擾。
事件驚動到無綫高層，誤以為他欠債，網民又誤會他是老千，最後大台掟他入雪櫃，搞到他冇癮離巢。
外面工作唔算多，去年九龍灣的茶餐廳又執笠，但52歲麥包唔認輸，唔止笑看逆境，更自勉：「要笑迎福來！」
一度覺得徬徨
麥包表示受滋擾，令他形象受損，身價大跌，現時雖然仍有代言工作，但價錢只是他在無綫時期的三份之一。去年1月已就騙案報警，而他向有關人士申請禁制令及索償一案，日前已開庭。
他說：「自己未到高峰，就俾呢件事拉番落嚟，我由九線尾、十線頭，一步一步行到今日，人生有幾多個咁多年呢？」
疑墮騙局前，他終於捱到在劇集《樓奴》做男二，戲份拍得住主角王浩信，又拍《愛.回家》，以及主持《街市遊樂團》，相當有人氣。
之後慘被雪藏，他無奈離開無綫，坦言：「一度覺得徬徨，對電影圈又唔熟，想主動都無從入手，有人搵就會去試，做五、六線都冇所謂，因為要生存。」
- 不時返大陸登台，生活不成問題。
- 《街市遊樂團》令麥包一度人氣大增。
任Do姐嘉賓收500元
期間他為節目《Do姐有問題》擔任嘉賓，只收取500元利是當酬勞。「若然靠參加綜藝維生，真係切腹同服毒自盡都唔掂。」他苦笑謂。
好在他一向瓣數多，不時返大陸登台，生活不成問題。
生意方面，雖然在九龍灣的茶餐廳執笠，但澳門總店仍然健在，力抗疫境。
去年他再同朋友，在觀塘開設主打自助餐的餐廳，屢敗屢戰。
他永不放棄，更表示：「面對當前環境，最緊要唔好自亂陣腳，保持學習心、平常心同感恩心，就一定能夠長做長有。」
工作少了，他就多了時間陪老婆，早前孖住去買外賣。期間他跟相熟舖頭的職員吹水，講下疫情，傾了大半個鐘，老婆頂唔順，催他上車走人。
他似乎不願回家，臨尾還要買雪糕，上車時才發覺被警察抄牌，為杯雪糕，唔見咗320蚊！
- 搞笑扮女人又得，麥包戲路廣。
仍住淺水灣豪宅
平日勤力搵錢，但他向來將所有收入交給太太處理，自己每星期只有500蚊零用錢。他的座駕已經揸了十幾年，一直冇換，慳自己寵家人，盡量給太太和一對子女好生活。縱使收入大減，他寧願食平啲、揸舊車，但爛船仍有三斤釘，他堅持跟過去一樣，月租八萬左右的淺水灣豪宅。
近年發展不順利，一度在大台跑出的他認為，假如沒發生這件事，自己不會只剩三份一身價；好彩的話，甚至已升三倍身價。
但現在一家人齊齊整整，他亦非常感恩，堅信明天會更好。
----------------------------
壹呼百應 號召有心人 請香港人睇壹週刊
按此了解更多
----------------------------
APP 內訂閱
1Click 搞掂 輕鬆簡便
按此了解更多
-----------------------------
【昔日紙本檔案庫】
30年壹仔經典 壹壹重現！
來源 source: http://nextplus.nextmedia.com
|
鍾意就快D Share啦！
|
|
|