2014年12月26日 星期五

[壹週刊 - 1294] 粗暴姦情 向阿 Yu認錯 小三 Ruby狠甩好性周永恒 Ruby,周永恒,BKD_S,劉伊靜,M1,




娛頭

粗暴姦情 向阿 Yu認錯 小三 Ruby狠甩好性周永恒

賤夫周永恒上週五( 12月 19日)就家暴案應訊,襲擊罪成的他被法官訓斥 EQ差及有暴力傾向,案件將於下月 30日判刑。

打走老婆趙頌茹後,有指坐正的小三 Ruby,亦成為補位的出氣袋。周永恒動輒郁手郁腳,咆哮喪鬧,將全部失控的粗暴情緒,發洩到她身上,自掘墳墓的 Ruby忍無可忍,只好提出分手。對於介入阿 Yu的婚姻, Ruby悔不當初:好對唔住阿 Yu!

上週五( 19日),周永恒到法院應訊,襲擊罪成的他被法官訓斥 EQ差,其間他舉手欲發言,即被法官斥責若再失行為,會將他困住。平日他亦容易情緒失控,將 Ruby當作出氣袋。

補位做出氣袋

去年中, Ruby在朋友介紹下,成為周永恒( Roy)的助手兼模特兒公司 partner,關係逐漸變化,做埋情婦。 Ruby介入的同時,阿 Yu跟周永恒關係愈變愈差,她更被老公多次動粗,要驚動警方。今年九月,周永恒上午打完阿 Yu,下午即 call Ruby到他家滿足發洩;即使家醜被揭,周永恒與 Ruby照樣秤不離鉈,出雙入對,其時, Ruby甚得周永恒寵愛。

但自從阿 Yu決定離開後,坐正的 Ruby,很快便成為代替品,逆地而處,做他的出氣袋。

「阿 Yu走咗,阿 Roy又孭住咁多官司,但 Ruby一直喺身邊鼓勵佢;但阿 Roy情緒好差,無論 Ruby講乜,都俾佢鬧,仲郁手郁腳,發脾氣嗰陣又鍾意掟嘢,日日捱鬧同喺暴力陰影下生活, Ruby覺得好難頂。」知情人說。

今年九月,本刊發現周永恒與 Ruby一齊離開女方寓所,孖住去便利店買東西,當時仍然錫住她。

Ruby曾經儼如周家一分子,今年周永恒生日,她有份到海洋公園為他慶祝生日。當日周永恒突然向阿 Yu發難,最後剩下 Ruby跟他切生日蛋糕。

漸進式疏遠分手

周永恒粗暴現形, Ruby雖然覺得已無法跟對方相處落去,但為免刺激周永恒,她根本冇膽量跟他一刀切。

「阿 Roy冇乜朋友,當正 Ruby係水泡, Ruby好驚佢唔知會做乜,所以冇講分手,只係慢慢疏遠,愈嚟愈少見,希望阿 Roy可以慢慢接受。」

本來是港視小花 Ruby(劉依靜),因為介入阿 Yu周永恒婚姻,賠上聲譽,更毀了前途。

「 Ruby知自己錯,但冇勇氣打俾阿 Yu。雖然佢同港視未約滿,但呢幾個月公司已經停晒佢嘅工作,連做第二女主角嘅新劇《夜班》就快出街,都冇叫佢幫手做宣傳,海報亦冇落 Ruby名。前路茫茫, Ruby有諗過去外地重新開始,但又唔知自己可以做乜,所以都未有出路。」 Ruby身邊人說。

為自己打氣

Ruby在 ig上的留言,被指是給周永恒打氣,但她卻表示是寫來鼓勵自己。

阿 Yu已重新站起來,近日不時參與公益活動。

有前科判重啲

根據鄧達明律師表示,周永恒被控普通襲擊罪,由於是在保釋期間再犯案,有前科會判得較重,有可能是社會服務令或短期監禁。若是改控其他傷人罪,則可能判入獄,刑期較長。

私下會道歉

本刊致電 Ruby,求證分手一事。

壹:壹週刊劉: Ruby

壹:你同周永恒分開咗?

劉:嗯,關於佢嘅嘢我唔想回應。

壹:你而家係咪回復單身?

劉:係,自己休息緊。

壹:有冇覺得傷害咗阿 Yu?

劉:呢件事上面係我自己處理得唔好,但太詳細嘅嘢,我唔想喺人哋嘅傷口上撒鹽。

壹:會否同阿 Yu道歉?

劉:呢啲我私底下做。

壹:仲有冇見周永恒?

劉:冇

壹:係咪想入番呢行(娛樂圈)?

劉:我控制唔到,唔肯定之後係點,所以而家讀住書先,我讀緊 event marketing,想完成埋個學位,但有機會入番呢行做就最好。

壹:屋企人知唔知你同周永恒分開?

劉:佢(媽咪)知!但冇過問我太多,已經係俾最好嘅空間我。

壹:呢幾個月沒工作,經濟有冇問題?

劉:暫時冇,之前有儲錢,而且同港視份約明年中先完,而家仲收緊月薪。

Ruby承認自己所作所為傷害了阿 Yu,向她表示歉意,但阿 Yu說:「對於佢哋兩個人,無論係 Ruby定周永恒嘅嘢都唔想再回應,希望告一段落。」問她覺得 Ruby是否真心認錯,阿 Yu坦言:「我對呢個人冇感覺!」

四歲女好懂事

周永恒上週五(十九日)被判一項普通襲擊罪罪成,目前正等候感化官報告。由於阿 Yu在案件結束前不能與對方聯絡,周永恒表示感嘆一家不可以團聚吃飯做冬。

對於周永恒聲言希望見到女兒,阿 Yu收起笑容說:「其實佢唔可以聯絡我哋,因為仍牽涉案件,兩個小朋友受到保護,做父女係一世關係,但處理當前嘅事先,唔可以妨礙司法公正。」

阿 Yu的經理人亦解釋,目前雙方不能接觸,完全是基於社工建議;日後官司完結,會為父女相見再作安排。

家暴揭家醜,阿 Yu不諱言四歲的大女十分懂事,有時見媽咪不開心,會主動哄她。阿 Yu更對兩個女兒作出承諾,日後要讓她們過一些開心又簡單的生活,不想牽涉入周永恒和 Ruby的恩恩怨怨。

中秋節後,周永恒將兩個女交給阿 Yu照顧(上圖)。事隔四日,情緒失控的他卻走到阿 Yu娘家大吵大鬧又吐口水,阿 Yu父親要報警求助,事後他強稱太掛住女兒,所以才會闖阿 Yu娘家。

Ruby成為小三後,港視新劇《夜班》稍後出街,並未找她宣傳,她為自己的任性付上代價。

阿 Yu自己擔起頭家後,獨力養家和照顧女兒。

周永恒一手破壞自己的家。

阿 Yu的下巴被周永恒打到要縫針,她身體的傷痕漸癒,但心靈創傷尚未復元。

阿 Yu和 Ruby曾經關係密切,阿 Yu更不時向她傾訴心事。

阿 Yu狀態愈來愈好,更開始幫助其他受虐婦女。

自認人渣

周永恒八月底打傷阿 Yu被捕,同時被爆出婚外情後,公開認錯及自認是「人渣」。

之後周永恒曾帶女兒出街做慈父真人騷,又謂好掛住阿 Yu,但阿 Yu踢爆他並沒聯絡她。

搞家暴安慰小組

慘受家暴,又要面對老公周永恒與助手 Ruby姦情的阿 Yu,最終鼓起勇氣脫離地獄式婚姻,帶住兩個女重過新生後,阿 Yu工作接踵而至,短短數月,已賺到近四十萬,相比昔日每星期只得一千幾百蚊家用,手頭鬆得多。

因為個人經歷,成為家暴女性重生典範的阿 Yu,索性將痛苦轉化力量幫助同路人。

「我嘅經歷,令到一班喺婚姻中受傷痛嘅女人透過網上聯絡我,招聚一齊成為一個安慰小組。因為我係過來人,好明白佢哋感受,所以定期透過聚會俾大家抒發同尋求解決方法。曾經一件唔好嘅事,只要正面面對,就會變成祝福。」

冇好下場

做小三,偷偷摸摸,到最後可以一無所有,夠薑如 Mandy Lieu,同正印擺明車馬,唔使一年,已有過億物業揸手;不過要人財兩得,其實萬中無一。

許仕仁 沈莉娜

前政務司許仕仁 08年開始包養港龍前空姐沈莉娜 Eline,豪花八百萬,買車買樓供小三在上海生活的許仕仁,只會偶然召 Eline來港,享受人肉速遞。

彭順  Liddy

與𡃁模 Liddy被拍到在公眾場所又攬又嘴,彭順背妻偷食曝光,即撲返大馬向老婆李心潔認罪,獨留在港解決爛攤子的 Liddy,同期還要面對父親吞槍自殺,情緒差到幾乎想自殺。徹底心死的她收埋自己半年,近日收拾心情重新出發。

九把刀 周亭羽

台灣作家兼導演九把刀,十月被踢爆跟中視記者周亭羽在汽車旅館開房,事後九把刀揀正印棄小三。備受小三形象拖累的周亭羽因自毀玉女形象,一度停工,更被網民狂插。



鍾意就快D Share啦!
Related Posts Plugin for WordPress, Blogger...