戴上假髮的洋妞，面對舞男貼身挑逗，亦會擺動身體全情投入，更加唔怕上鏡。（胡智堅攝）
編輯室手記
攝記大戰鬼妹&港女
今期《圖片故事》講脫衣舞男，照片傳回公司，一班港女港男同事都話有動感又夠真。事緣近年有人搞一盤生意，在網上聲言可速遞脫衣舞男幫人賀壽，究竟有幾好玩，記者於是約訪英國人老闆，他爽快答應：「 Interview? Interesting! Let's come with us.」
見面採訪，老闆即介紹兩個幫他搵食的大隻舞男，來自巴西的肥佬 Brazil（藝名）、意大利廿三歲嫩口 Luca，三人上門「接客」（強調只係跳舞，無另類服務）帶着一大袋道具——加細版 T-back、 baby oil、香檳、玫瑰。而記者跟他們搵食，亦見識到鬼妹和港女的分別。
第一次採訪，先到達客人在柴灣工廈一個單位，肥佬 Brazil在後樓梯換衫時有點緊張，唔係怕醜，而係因近日多咗好多豬腩肉，褲鏈點都拉唔埋，記者都無能為力只能祝佢好運。入到場， Brazil即扯破件衫露肉，點知今晚一班講英文的鬼妹（包含黑白黃膚色）客人比他更放，個個頭戴金色紅色假髮、紅唇烈焰，穿性感緊身裙大叫大跳勁舞。
Brazil賣力扭動時，鬼妹們亦會搔首弄姿俾反應配合，面對攝記鏡頭更加無有怕，全程做番自己又摸又放，攝記阿 Ken和阿 Wing都好滿意呢輯相，因為一個字：真。
第二次跟另一位脫衣舞男 Luca上酒店，打開門是開睡衣派對的港女——對，清一色十多名港女。她們見到 Luca脫衣時，反應卻跟鬼妹好唔同，笑得較含蓄無乜大叫之餘，更加唔敢企埋舞男身邊。 Luca見港女如此內向，唯有出招挑逗，逐一將她們抱入懷中，又來一招爆衫以肌肉進逼，被「色誘」的港女卻臉紅掩面，其餘則在三呎以外拿起 iPad邊影相邊大笑。
見到攝記鏡頭，她們更加閃避，搞到阿 Ken和阿 Wing要全場走來走去先搞得掂，最後更有多張相因港女掩面而效果不理想，更加唔明點解俾得錢玩卻如此害羞。
記者的鏡頭是一面鏡，平日影示威者的激情、影大孖沙的豪氣、影露宿者的悽酸，都為呈現最真實的社會立體感。今次影這輯《圖片故事》，我們不單感受到鬼妹港女的文化差異，還有故事的兩位舞男主角，被人奚落「太短」時仍要笑笑口頂硬上。他們原來準備到世界各地尋夢，香港只是人生旅途的其中一站。
「香港可以搵多啲錢，我好鍾意呢度。」訪問完他們，望望充滿陰霾的維港上空，此刻的香港像個圍城——城外的人想衝進去，城裡的人想逃出來。（莫志樑）
|
鍾意就快D Share啦！
|
|
|