插圖：劉志誠
八卦陣
肥佬黎收買美國佬
肥佬黎（別號民主黎）俾人摷出九百幾張文件，證明佢一路濕緊水俾大小白鴿仔。佢嫌錢腥乎？爆料人暗示佢點會咁好死吖，佢背後肯定有人想玩嘢，而搞鬼者並非別人，正係美國佬也。
美國佬何以要假手肥佬黎濕水俾白鴿仔？強國迅速崛起，花旗唔順超，於是喺香港玩嘢，威脅《白皮書》所講嘅中國嘅「主權、安全和發展利益」。證據何在？肥佬黎有個花旗朋友叫沃爾福威茨，佢做過副國防部長，係個大右派、從來都唔妥大陸。肥佬黎同佢過從甚密，一齊遊船河、傾密偈。有乜景轟？總之係「你懂的」。
但係爆料人顯然冇乜腦，竟然連肥佬黎俾美國佬張七萬五千蚊美金都揚埋出嚟。咁依家係邊個俾錢邊個先？唔通肥佬黎咁大把炮，收買美國去搞大陸？唔係吖嘛。
問捐款陳勇即閃
肥佬黎大方承認有捐錢俾支持民主人士，反而保皇黨對捐錢收錢唔敢多提。話說上週日青年時事評論員協會搞政改論壇，邀請近年急速冒起嘅新界社團聯會理事長陳勇（ Brave Chan），以人大代表身份做講者。記者以為 Brave哥無畏無懼，諗住請教一下新社聯接受捐款嘅事，點知佢即刻黑面，第一句就問記者係邊間傳媒，之後話所有捐錢都係用喺社區發展服務，但對於新社聯每年收幾多錢、邊個捐錢、點樣捐錢，全部唔回應，仲拎住公事包嬲爆爆走人，睇嚟 Brave哥都唔多夠勇。
周融難捨居英權
「保普選反佔中大聯盟」召集人周融之前自爆一早攞到居英權，星期日喺簽名街站就係咁俾人話係漢奸、走狗，搞到佢主動同記者講當時申請只係「買個保險」，話同其他香港人一樣，有着數就會攞：「有一個居英權嘅着數，喺香港七百萬人度，有五萬人攞得到，咁我咪攞咗囉！」佢又信口雌黃，話居英權無得放棄。
不過，星期一周融見完林鄭之後俾記者追問居英權問題，佢好不情願咁話已經聯絡咗律師打算放棄，話「留住亦冇用」。根據英國政府網站，申請放棄英國公民身份係要提供護照或者註冊成為英國公民嘅證書，但係無申請英國護照嘅周融話張居英權證書唔知擺咗去邊。唔通佢又想用呢個藉口話放棄唔到居英權？
其實，周融唔使搵律師，我哋都可以再提供一個方法俾周融，根據英國政府網站係可以申請補領英國公民證書，承惠八十五英鎊。英國駐港領事館職員亦話，上網下載表格填番俾領事館，就可以放棄居英權。
跑數樣板信
周融曾揚言要搵到八十萬個簽名反佔中，搞到大、中、小型嘅保皇組織都要交數。其實，公眾唔係好清楚阿爺點樣落柯打、收到命令嘅組織又會點傳遞呢啲訊息，本刊攞到一封樣板信，相信讀者會易啲明白「百萬簽名是如何煉成的」。「北海聯駐港辦」近排發出內部信件，分配旗下嘅理事、青委，動員去所屬嘅灣仔、太古城、柴灣街站跑數，並要求各人以表格方式提交「履職」情況，包括「自己簽名、發動簽名、發表文章、發表聲明、接受專訪、組織及參與社團活動」，信件仲講明會「隨收隨報」，究竟係報俾邊個聽？
「北海聯」即係北京海外聯誼會，喺中、港、澳有三百名成員。根據左報報導，該會今年三月喺澳門舉行「賓主」春茗，席間理事長蕭聖立仲多謝中聯辦、北京市委統戰部一直嘅支持。蕭聖立係聖大控股主席，主要做中國基建投資，喺西營盤香港商業中心有辦公室，行五分鐘就到中聯辦，好方便。
記者錯怪王丹
八九學運領袖王丹近日喺 facebook留言，因為有家族中人有腦瘤病史，佢都懷疑自己患腦瘤。記者五月去台灣做六四廿五周年特輯時，都有搵王丹做訪問，仲記得當日開始訪問時，王丹已經話呼吸唔暢順，又話頭痛，記者以為佢嗰排做咗太多訪問，疲勞過度。
三十分鐘後訪問結束，一大班人轉場幫王丹影相，點知佢突然話：「非常悶，沒有空氣的感覺。」攝影同事惟有急急㩒快門，一分鐘後，王丹一臉嚴肅話：「我再站在這裡就要暈倒。」萬一呢位學運領袖突然暈倒，記者責任重大，於是匆匆完成拍攝工作，同王丹講拜拜。
記者事後有啲疑惑，點解 facebook上面睇到文質彬彬嘅王丹，真人咁有性格？不過，見到佢呢排受健康問題困擾，記者恍然大悟，相信王丹當日真係好唔舒服，唔係擺架子。希望今次只係虛驚一場、順祝佢身體健康。
|
鍾意就快D Share啦！
|
|
|