珍妮曲奇尖沙咀美麗都總店，以往日日大排長龍。記者發現上週五中午高峰時段，不單長龍消失，門口更只得一名南亞裔人士徘徊，鋪內則只有十名顧客。
時事短打
強國人龍消失 珍妮曲奇回歸本土
珍妮曲奇的熊仔罐上，近日是一隻愁眉苦臉、著藍色工人褲的扁嘴小熊。訪港強國旅客數字大減，珍妮曲奇門外、持續多年的拖喼大陸客人龍，原來已在一個月前消失。唔開心的小熊仔，難道是老闆心聲？
「一週一行」新措施出爐，強國客跌勢料將持續，珍妮曲奇創辦人楊賜梅（ Jenny Yong）向本刊表示，已準備好變招自救，打算重推十年前創業之初，港人最愛的自家鳳梨卷，還有當時好好賣但製作功夫多的鳥結糖、藍棗糕、杏仁片，計劃回歸本土，重新吸納香港人生意咁話。
珍妮曲奇出名日日大排長龍，位於尖沙咀的美麗都大廈總店，以往每天早上九時開鋪前，已有人在商場對開的麼地道街頭排隊兼等派籌，中午高峰更有百多名拖喼大陸人等候，平均等一小時方能進店，每人只限買兩罐。
記者上週五觀察，發現麼地道的長長人龍已消失，珍妮店內只有廿人左右等候買餅，而且不再限購數量，但未有減價。珍妮曲奇「粉絲」、香港人陳小姐驚訝地說：「以前起碼排半個鐘，而家五分鐘就買到啦。」珍妮另一間位於上環永和街的分店，同樣不用排隊，店內同一時間只有數名客人，不見大批拖喼客。
珍妮曲奇是大陸人眼中的「最火手信」，創辦人 Jenny向本刊承認，三月初起，排隊人數明顯減少，當時社會出現連串反水貨客「光復行動」。她說：「過年前都係大陸客多，但自從香港人反水貨客，大陸客係少咗，但我仲有好多日本、韓國客，仲有多番香港人來買，以前好多香港人食唔到。」
「熟客仔」取貨少一半
本刊去年揭發，珍妮曲奇有個門市以外的地下銷售網絡，一班水貨客不用排隊，便能從珍妮工場拿到一袋袋曲奇，再分散到淘寶網或尖沙咀重慶站商場的小店出售。 Jenny曾說過：「嗰啲係我以前啲熟客仔，佢拎啲貨去邊，我唔知道。」
近日 Jenny發現，來向她攞貨的「熟客仔」明顯比以前少，取貨量減了一半，「以前可能佢哋攞一百罐，而家可能攞得五十罐。」 Jenny稱她不知道這班「熟客仔」驟減的原因。記者週六到美麗都大廈外等候，珍妮曲奇的貨車，從柴灣工場抵達後，只見店員把曲奇送入店，不再見到大批水貨客來取貨。重慶站商場的小店店主則聲言：「四月係旅遊淡季，近日的確賣少咗。」
Jenny一直拒絕透露生意額，但她曾經向本刊承認，每日可賣出五千至六千罐曲奇，以每罐平均價一百二十元估算，她的曲奇王國年度營業額高達二億元。強國客人龍消失， Jenny的生意跌勢究竟有幾甘？她卻口口聲聲力撐指「無大跌」：「我好樂觀，但我未知嚟緊個市場點變化。」
好識做生意的 Jenny，深明人龍不再、水貨客大減，代表曲奇警號已響。加上「一週一行」實施，強國客源正式亮紅燈， Jenny原來已諗好變招，希望「回歸本土」，重新吸納一班香港擁躉。
無排斥香港人
Jenny記得十年前創業之初，在赤柱家附近小商場開樓上鋪，最好賣的除了是牛油曲奇，還有她的鳳梨卷，「嗰時幫襯我嘅，多數係香港人，佢哋好鍾意我嘅鳳梨卷，因為重菠蘿味，又鬆化，唔似得台灣嗰啲。」未幾已吸引傳媒爭相報導而揚名，鳳梨卷唔夠賣，「鳳梨卷成本同曲奇差唔多，但要好多工序，又唔擺得耐，所以我唔係日日做，要留名預訂，做好再逐個逐個客通知，買到嘅人好似中咗獎咁。」近年 Jenny主力賣曲奇賺得好和味，難做的鳳梨卷，原來已停產兩年。
「再遲啲生意唔好的話，我可以做番鳳梨卷。我想做番好耐，如果曲奇餅需求真係無咁大，我或者會有多啲時間去做個菠蘿漿。」她說，本地人買餅的「消化力」，遠不及源源不絕的內地客，故要加推款式，生意才會增長。
Jenny又記得，她未發跡前，鳥結糖、藍棗糕、杏仁片同樣受香港客愛戴，「以前我老公間中揸車幫我送貨，親自送去寫字樓、學校、醫院，個個都話好食。」她說，這些小吃同樣因工序繁複後來減產，如今 Jenny正考慮讓它們「重出江湖」，一盒十七粒的鳳梨卷則維持賣八十五元。
想不到，十年後的珍妮，或要回歸到十年前的珍妮，做回按香港人口味生產的「原始」珍妮。但由於近年珍妮大做強國人生意，在本土大氣候下，曾經被新世代批評「大陸化」、「唔代表香港」， Jenny要重食老本，可有打算先改變形象？來自馬來西亞的她企硬話，自己從來都無排斥香港人：「事實就係事實，天知我唔係咁，我唔需要解釋。」她又說，自己唔使洗底：「個市場係開放嘅，我控制唔到客源，做生意就係要公平，如果我開一條 line淨係俾香港人，咁都係歧視。」
|
鍾意就快D Share啦！
|
|
|