全城熱爆的娛樂八封新聞 & 時事趣聞 & 生活 + 趣聞
網絡世界，資訊之所以滲透得又快又廣，因為㩒個掣就可以 share，生活上，邊個醫生有料到、邊間食店有水準，同樣可以喺討論區搵到用家意見。不過我哋個民間特首，就鍾意人肉導向，唔單只係口傳，仲會親自帶團。
上星期四（四月十六日），戴帽戴超再幪埋面嘅發哥，去又一城睇完《五個小孩的校長》後，跟住再同兩個行山團友落咗佢個「鐵票倉」九龍城。由魚蛋檔、菜檔、生果鋪、海味鋪、藥材鋪到乳酪雪糕店，去勻。識途老馬，發哥將發嫂幫襯慣嘅鋪頭，定點介紹俾團友知，嗱，未必一定係平，但啲嘢就一定係靚，仲有民間特首做中介，點都會計平啲。
去到菜檔，發哥向兩位隨行團友講解食番薯對身體有幾好？應該連皮食之類之類。
買完菜，過條馬路去買魚蛋墨丸，發哥自動波攞牙籤㓤魚蛋俾團友試食。
介紹完魚蛋再過隔籬金城海味，一心幾用嘅幪面發哥，篤住《壹》仔鏡頭。
藥材鋪、生果鋪，當然冇錯過。
兩位團友跟住發哥逐檔買，慳咗唔少之餘，仲去幫襯埋乳酪雪糕店，滿載而歸。
