探熱針
重新上板 當新人咁谷 湯寶如借關楚耀爆肌復出
樂壇新人難發圍，《勁歌金曲》都唔夠《 Sunday靚聲王》好收視，舊曲新唱有市場，加上見開完入行三十週年個唱的陳慧嫻有人氣，環球唱片食住條水，摷埋湯寶如出嚟，全面復出，又出動關楚耀挺肌助勢，一於當湯記新人咁做。
第一波陳慧嫻
陳慧嫻去年舉行入行三十週年紀念演唱會叫好叫座，翻唱經典歌的唱片更成為全年最高銷量之一，新不如舊的情況下，環球今年三月重組寶麗金，又打晒鑼開記者會，宣布陳慧嫻加盟。舊將跑到數，據悉寶麗金計劃翻箱倒櫳，緊接陳慧嫻的，是昔日三小花之一的湯寶如。
「上年慧嫻無論個唱定係唱片都勁賣得，而且個勢亦一直 keep得住。近兩年公司用寶麗金牌頭喺海外搞咗唔少演唱會，都係主打陳慧嫻、王韾平、湯寶如、周慧敏、陳曉東、關淑怡、李克勤做巡迴騷搵錢，佢哋啲歌始終喺美加、內地多人識，所以長做長有。簽慧嫻只係第一波，公司而家都傾緊幾個，包括湯寶如。」知情者說。
出道時有同門歌神張學友合唱突圍，今日復出，湯寶如換上後輩關楚耀合唱昔日經典歌《感冒》及拍 MV；為人為到底的關楚耀更除衫晒肌，在網上自彈自唱《感冒》，幫湯記試水溫。
全面復出，被唱片公司當新人咁谷的湯寶如說：「寶麗金叫我唱，咪試吓咁囉！自己都想簽番寶麗金，但遇到好歌先算啦。」
男友接力湊仔
下月九日，湯寶如將與陳慧嫻、周慧敏、陳曉東等到廣州舉行寶麗金演唱會，事實上，湯記幾乎每個月定時定候返內地做商演，她人不在港，囝囝便交老豆接手。
「都唔關唱騷冇時間湊仔嘅事，係爸爸（男友陳德民）做咗我個角色，我一直都強調事業係緊要啲，我鍾意做嘢，人唔可以唔做嘢。」湯寶如說。
過去曾經搞過生意的湯寶如表示，因為要定期返內地唱騷，早已結束了工作室的業務，但她有計劃搞小朋友美術班，始終做咗人媽咪，對同小朋友有關的，比較有興趣。
出奇制勝
樂壇已經癱瘓多年，新人固然難出頭，就算老資格歌手亦要出奇制勝，抓緊一閃即逝的復活良機。
陳慧嫻
13年復出樂壇的陳慧嫻一直毫無起色，直至去年翻唱草蜢及鍾鎮濤等的 hit歌後忽然翻生，跟住個唱賣得，並在內地巡迴密密執。
蔣志光
在電視劇《老表！你好 hea》以舊曲新詞唱《相逢何必曾燒衣》，一時間成為網絡大紅人，去年更攞埋大台「最佳男配角」及「專業演員大獎」，威到盡！
|
鍾意就快D Share啦！
|
|
|