• Patrick每朝 10點就會起身「操機」，但因長期對電腦太多，所以起身對眼會又乾又澀。
Main Camp
日煲 12粒鐘 90後《星海》機王：電競唔係打機咁簡單！
唔少男人沉迷打機，無論 RPG、即時戰略、第一身射擊定模擬育成，梗有一款啱口味。
不過估唔到喺打機風氣普及嘅香港，要成為職業電子競技選手，竟然同香港運動員一樣，少啲毅力都唔得㗎！現讀加拿大國際商務網上遙距課程高級文憑 Yr.2嘅何文瀚（ Patrick），原本在加拿大修讀大專，但為咗一圓做電競手嘅夢想，毅然停學一年，返香港發展。可惜電競喺香港冇人支持，行業發展又唔發達，結果日日匿喺屋企苦練，不過仍無損佢嘅夢想：「電競唔只係打機咁簡單！」
20歲 Patrick係即時戰略遊戲《星海爭霸 2》玩家， 12歲已開始，一打打足八年，現時在公認全球約 3萬多名精英雲集嘅韓國伺服器排 180名，他解說：「港台澳伺服器的對手已經滿足唔到我，所以同最高級嘅韓仔對打！」
喺香港冇人認同
Patrick可以說係本地《星海》一哥，但呢個成績對 Patrick成為職業電競手冇帶嚟幫助：「上年《星海》台港澳區選拔賽成 3萬人參加，我係唯一一名港人入到 8強去台灣爭冠軍，點知台灣話估唔到有咁高水平嘅香港玩家入 8強，所以根本冇預算包我機票同酒店，賽會負責人話『一係放棄比賽資格，一係自費參加』。我當時真係嬲到上心口。」好彩 Patrick一年前返香港去過本地電競公司 HKEsports做實習，之後直接搵該公司老闆鍾培生資助，「我嗰時都係諗住搏一搏，提議用 HKEsports名義去參戰，點知鍾生一口答應包我所有使費，我先可以成功去參賽。」
好多人覺得，電競說穿了便是打機，浪費時間，不過仍吹唔熄 Patrick團火：「其實電競一早已經風行全世界，喺內地更加被納入為第 99項體育項目，頂級電競手每月可以搵 3、 4百萬人仔。中、台、韓、歐美嘅電競手全部都有職業戰隊，日日包食宿軍訓式操成 12粒鐘，辛苦過唔少行業多多聲，背後又有教練團、戰術分析師教路，仲有心理學家、物理治療師協助隊員提升表現，講專業更加唔會輸蝕俾其他行業，絕對有前途。」
不過喺香港，電競根本冇人認同：「喺香港冇包食宿都算，連教練都冇，個個都只可留喺屋企死煲爛煲，衰過玩體育。我算好彩，有電玩平台畀 4至 6千蚊請我教人打《星海》，勉強支持到生活開支，如果唔係真係零收入。」
讀書冇人生目標
Patrick靠教打機幾千蚊過活，畀埋家用，每個月超緊絀，「平時慳得就慳，多數麥記，又快又平，爭取時間回家練習，買衫買鞋都好少，況且本身練習已經花好多時間，所以都好少約朋友出街。」
Patrick一年前停學回港，立志投身電競手已經作出最壞打算：「喺多倫多留學 2年，以前都算鍾意讀書，但成績只屬中等，覺得冇乜人生目標，自從認識電競先發覺自己興趣，所以想趁後生試一試。其實𠵱家前景仲係好迷茫，未有戰隊邀請我做電競手，但已經比我想像中好，起碼自己照顧到自己。自己目標諗住操到 30歲，有戰隊邀請我加入做全職！」
電競評述員搵到錢
雖然香港做電競手暫時未有出路，不過電競評述員卻大有可為，尤以評述時下最受歡迎的《英雄聯盟》最吃香，就讀屯門 IVE機械工程 Yr.2嘅何狄麟（何秋）和恒生管理學院商務翻譯 Yr.1嘅黎同博（ Brian），不約而同由玩家轉做粵語評述員，因為佢哋都覺得評述員前景較好：「電競手入行難兼競爭激烈，相反香港粵語評述員唔多，行內得 2、 30人， HKEsports仲要獨家代理《英雄聯盟》嘅直播粵語評述，唔驚冇工開！」
HKEsports總裁 鍾培生
自己本身讀書時期已經好鍾意電競，所以想成立一間電競公司幫一啲有意成為電競手嘅年輕人圓夢，奈何電競呢行喺香港仲係起步階段，公司逼於無奈將訓練基地放在台灣，隊員都是當地人。
打機拍片仲好執
本地職業電競手收入坎坷，但無聊亂玩一通嘅打機片，卻大有市場，唔少 webber都爭住拍放上 YouTube，以 10,000點擊收 70蚊（連廣告），真係執到笑！
|
鍾意就快D Share啦！
|
|
|