心理專科求診
上週四（ 7日），張建聲愁爆到中環一間心理專科診所求診，明眼人一睇都覺得佢神經緊張
真面目
肥出禍 急肥 50磅 惡監躉難抽身 張建聲捱壞：要切脂肪瘤
為咗演活新戲《壹獄壹世界：高登闊少踎監日記》惡霸肥監躉角色，足足用咗 10個月時間谷肥 50磅嘅張建聲，拍完再用 3個月極速打回原形，之後仲為宣傳而踎監 3日，搏到盡！
之不過身體時肥時瘦轉變咁大，精神同身體機能梗係易出事！據知張建聲因為抽離唔到角色搞到精神崩潰，加上食唔安坐唔落容易發脾氣，最終要搵心理醫生打救，同時身體亦捱出毛病。他說：「有粒脂肪瘤喺胸同腹裏面凸咗出嚟，要安排手術切除！」
演「向西仔」為人熟悉嘅張建聲，過去角色多數都屬搞笑類型，相反今次新戲就小試牛刀，除咗要谷肥變大肥佬，仲要扮演十惡不赦肥監躉，最後仲因為入戲太深而難抽身，身體同精神齊響警號，最後搞到要睇心理醫生又安排手術切除脂肪瘤，陰功豬豬！
少年萬梓良
新戲《壹獄壹世界：高登闊少踎監日記》，張建聲唔只谷肥化身 200磅大肥佬，其中惡霸角色亦有好大發揮空間，正如戲中不少打男人同女人嘅暴力場口，鏡頭前「萬梓良」上身，個樣夠晒兇神惡煞，鏡頭後亦搞到身邊唔少人都驚咗佢，仲被封為「少年萬梓良」。
張建聲話：「自己梗係覺得開心佢（萬梓良）嘅戲路冇人可以模仿到，可以接近佢，作為一個演員已經好開心我絕對唔介意接受呢個銜頭，會好好令到佢發揚光大㗎！」
五勞七傷
張建聲身形暴肥暴瘦，精神同心理上都受到煎熬，最後仲搞到精神崩潰，要急搵心理醫生打救。
上週四（ 7日），本刊撞見張建聲一臉愁爆到中環心理專科診所求診，他亦承認精神出現問題，他說：「拍完精神上係有啲分別嘅！會好易𤷪同躁底，加上拍完要即減肥，心理同精神上負擔好重，好小事都會對屋企人發脾氣，眼神都比之前變化好大，時不時都會有阿積（戲中角色）嘅影子出現。（醫生點講？）佢建議我多啲同朋友傾偈，唔好做完嘢就返屋企，叫我開懷啲。（暴肥暴瘦有影響？）身體有一個反效果出咗嚟，增肥減肥時間急得滯，有粒脂肪瘤喺胸同腹裏面凸咗出嚟，醫生就話增肥減肥速度太快，身體未必適應到，搞到脂肪會積住係嗰個位，現階段要再畀醫生睇睇，然之後就要安排做個小手術。」為部戲搏成咁，下次要叫老闆蕭定一加片酬
速肥速瘦好傷
一年之間，張建聲經歷暴肥暴瘦嘅過程，不過就搞到自己身體周身病痛，加埋精精上嘅困擾，難怪連佢都話自己減得好唔健康！大家記住咪亂試呀！
餐單
早餐：麥皮， 3隻蛋白
無午餐
晚餐：白烚雞柳 6條
除星期三、日，每天都健身
一小時舉重，一小時帶氧運動
|
鍾意就快D Share啦！
|
|
|