探熱針
轉死性：大台派粒糖 歌手車馬費$100變$1000
眼見 Now明年開免費台，加上內地樂視殺到搶客，對手左右夾擊，恃住一台獨大㩒住荷包的 TVB，亦被迫改變策略，對與無綫有合約的歌星扮闊佬，車馬費由昔日一嚿水加碼十倍，「重酬」一千！
靚聲王先加碼
歌手在無綫出鏡，無論唱幾多首歌，花幾時間為大騷彩排演出，車馬費都只得一嚿水！直至最近，綜藝科阿頭余詠珊落 order，要對簽約歌手「仁慈啲」！
由秋官阿姐揸旗的音樂節目《 Sunday靚聲王》開始，出席歌手包括之前宣傳個唱的呂方， J.Arie、林二汶、曾路得、 C All Star等，一律獲「加薪」，車馬費由過往堅持抗通脹一百蚊，忽然加多個零變一千，打破大台慳字訣。至於上 J2節目《姊妹淘》的非合約藝人，車馬費都派五百，出晒血！
方丈變大方
據了解，過去面對一線歌手如容祖兒、李克勤等，無綫其實會彈性處理，但即使唔敢俾「賤價」一嚿水，極其量也只得三百；就算同老細殼王老死的校長譚詠麟，撐場做大騷，也只得五百。如今歌手新人出鏡派一千，咁爽手，全因競爭對手開水喉，要打硬仗，無綫唔敢再放肆，大幅加薪，扮大方！
除了派糖，無綫仲玩「特赦」。之前因為幫港視拍劇，蘇永康被無綫封殺多時，兩個月前，突然獲解禁，現身李思捷主持的《今晚睇李》，之後蘇康更獲邀做港姐評判；不計前嫌，小器方丈變得好大方！
和頭酒示好
日前，余詠珊孖住負責無綫唱片部的老公何哲圖，廣邀唱片公司食飯，主動示好。
「佢兩公婆話嚟緊 J2開好多音樂節目，需要好多歌手支持，希望大家（唱片公司）同佢哋緊密合作，余詠珊仲話要帶頭搞番好個樂壇，真係笑死人！佢哋唔記得呢幾年點對其他唱片公司，單係排隊上《勁歌》都要睇面色，大騷同獎就更加益晒自己友巨聲幫，有時攞咗歌手期上節目，可以一句話：『都係唔使你哋！』冇交代就踢人走。
「依家加咗車馬費，又吹雞食飯講合作，其實都冇用！今時今日，唔會有公司會俾歌手再簽死 TVB，自由身，個個台都去。」知情者說。
加碼挽留失敗
面臨打仗，大台唔敢再孤寒。有傳殼王陳國強為挽留將離巢的胡杏兒，出到 3600萬簽三年的銀彈攻勢留人，又把她孭飛的劇集《陪著你走》提前出街做餌，可惜仍留不住對大台心灰的杏兒。傾唔掂數，劇集宣傳將她封殺。
撰文、攝影、攝錄：娛樂組
nextplus.nextmedia.com
|
鍾意就快D Share啦！
|
|
|
