探熱針
捱冷板：忍無可忍 謝安琪摸去後巷張繼聰
就算不是無綫親生仔，張繼聰一樣拍劇主持齊做，搵得唔多，但曝光高企。
拍劇無日無天，同一時間仲接埋林家棟監製的新片《死開啲啦》，兩公婆各有各忙，兩個月冇同老公傾多句的謝安琪，在內地登台返港，即撲落拍戲現場，摸去後巷，摷張繼聰。
陪通宵
張繼聰轉運！在無綫劇接劇外，亦開始有機會上大銀幕，除了《葉問 3》和宇宙甄子丹合作，仲有林家棟做監製的新片《死開啲啦》。「嗰段時間啲期撞到正一正，但監製（林家棟）好好，肯盡量配合，自己兩樣（電視、電影）都好想做，寧願辛苦少少，試過有啲日子係日頭開劇，夜晚開電影，完全冇得瞓都幾癲吓！」張繼聰說。
劇集電影兩邊踩，持續超過兩個月，住埋一間屋，同老公得 say hi同 say bye，謝安琪呻到一地樹葉。
「佢兩個一向都好恩愛，幾忙都會抽時間傾吓偈，同個仔食吓飯，但嗰兩個幾月， Louise（張繼聰）個工作期表全滿，有時返屋企沖個涼，又要出去開工；以前未試過咁，所以 Kay都唔慣。」身邊友人透露。
據張繼聰說，有次謝安琪在內地做完登台，返到香港知老公正在拍電影外景，就算攰爆，都即刻碌落去現場探班。
「謝安琪連妝都冇落就撲落嚟，到嗰陣咁啱張繼聰埋緊位，佢坐埋一邊等，最終坐足成晚，等到凌晨四點，同老公一齊走。」一名劇組工作人員說。
處男下海
繼《打擂台》後，林家棟再做監製，新片《死開啲啦》除了張繼聰，還有林德信、吳浣儀等演員，林德信更處男下海，頭一次吊威吔拍動作戲。
其中有場戲，張繼聰要同冇動作經驗的林德信和盧覓雪疊羅漢肉搏，但都只係拍咗三粒鐘就搞掂。
「全靠監製，佢一定要演員圍讀，大家都知道要做啲乜，所以拍得好爽！」張繼聰說。
撰文、攝影、攝錄：娛樂組
nextplus.nextmedia.com
|
鍾意就快D Share啦！
|
|
|
