探熱針
老豆俾人蝦 Hanna喊爆 劉華向「家人」認恨仔
剛在泰國布吉和發哥拍完賀歲電影《賭城風雲 3》的劉華，返港後立即吹雞，與「華仔天地」過千「家人」在九展開 P，提早慶祝五十四歲（九月二十七日）生日。「家人」見面，妻女同場，劉華更在「家人」面前自認恨生個仔！
兩個半鐘的聚會， Hanna由爸爸抱住兩度上台；其間劉華同粉絲合演《西遊記》話劇時被掟蛋糕， Hanna誤以為爸爸被打，當場爆喊。
夾攻掟蛋糕
慶祝牛一，劉華以一身紅色唐裝現身。
「今日原本要去《金雞獎》，但要嚟呢個活動，所以冇去到。」劉華一講完，司儀陳芷菁第一時間擦：「就算攞唔到獎，心目中你已經係影帝。」
點知壽星唔受氹：「心目中有鬼用咩！我夠心目中有個仔囉！」一二年囡囡出世後，劉華夫婦一直希望追個仔，為此，二人茹素又求神拜佛，可惜仍未造人成功。
之後有女歌迷送上親手畫的肖像畫，陳芷菁問：「下次俾唔俾畫一家三口？」壽星寸嘴：「唓！一家三口有乜所謂啫！識畫咪得囉！我怕咩呀？」可以在「家人」面前認想生多個仔，劉華的確冇有怕！
「家人」開始起哄：「見大嫂（朱麗倩）！」劉華隨即用普通話介紹妻女出場：「今天我希望太太同女兒一齊分享。」兩母女在一堆保安包圍下現身，坐在第一行，身穿白色長裙的朱麗倩化了淡妝，全晚笑唔停口，跟媽咪同著白的 Hanna，就不停食手指。
聚會兩個小時，當中劉華粉墨登場同歐陽妙芝等合演話劇《西遊記》，劉華做孫悟空，要被其他演員夾攻掟蛋糕，搞到滿面忌廉，台下的 Hanna見到爸爸被欺負，當場爆喊，要劉華入後台呵番。
到重頭戲切蛋糕環節，劉華抱住囡囡上台，怕醜的 Hanna樹熊一樣，擒住爸爸唔放。「佢（ Hanna）頭先喊呀！以為我真係俾人打，喊到收唔到聲呀，我氹佢氹咗幾耐先肯出番嚟。」劉華說。主持接着請朱麗倩和劉華父母上台，劉華立即走到台邊拖老婆，又搞笑同華爸說：「阿爸，你拖阿媽」
其間，台上的 Hanna繼續喊唔停，劉華用紙巾幫囡囡抹鼻涕，朱麗倩則負責撥頭髮，直到唱生日歌， Hanna終於笑番。切完蛋糕落台，劉華細心叮囑朱麗倩：「妳慢慢！我抱……我抱……！」
老婆眼濕濕
重視粉絲如「家人」的劉華之後連續唱了七、八首歌，更親自改詞，對台下的 Hanna說：「阿囡，聽吓送俾妳……《來生也需要妳》！」搞到台下朱麗倩眼濕濕。
唱到《中國人》時，劉華又望住囡囡：「眼瞓未呀？要唔要《中國人》呀？」 Hanna即刻點頭，劉華再問：「咁你唱唔唱㗎？」 Hanna一邊捽眼一邊擰頭，劉華都冇晒符：「皇帝！好眼瞓呀？」
唱到中段，劉華再次將囡囡抱埋上台， Hanna伏在爸爸心口，嘴仔郁郁跟住唱，超可愛！
暫時未追到個慈姑椗的劉華，視寶貝女 Hanna為掌上明珠，「家人」開 party，「家長」劉華將自己其中一首歌《真心朋友》重新填詞，改埋歌名《來生也需要妳》，送給三歲的向蕙。
《來生也需要妳》
天光天黑我都想妳 全為妳生死心塌地
爸爸媽媽太喜歡妳 求下輩子不會忘記
無從稽考好冇道理 連落雨有妳也當做明媚
年華青春再會有期 承諾永遠拒絕離開妳
當初孤單一人沒趣味
茫茫人潮能找到你 心𥚃有妳
難捨跟你別離 今天珍惜家人在這地
我要抱你每天親你 一世愛着妳
來生也需要妳 我嘅世界完全是妳
祈求神靈能為我哋 下世繼續纏住妳
撰文、攝影、攝錄：娛樂組
nextplus.nextmedia.com
|
鍾意就快D Share啦！
|
|
|
