掃呢頁CODE去手機

2015年9月24日 星期四

用完即棄 禁行埋半年 明𡁻索麗穎 陳偉霆設局撇阿 Sa [壹週刊 - 1333] 陳偉霆,M1,



星期一,阿 Sa出席排舞活動,首度開腔回應分手事件,其間更講到眼紅紅。

娛頭

用完即棄 禁行埋半年 明𡁻索麗穎 陳偉霆設局撇阿 Sa

星期日( 20/9)凌晨,阿 Sa(蔡卓妍)同陳偉霆夾好時間,各自在微博宣布分訊,由始至終不被睇好的姊弟戀,五年情終於玩完。

兩人在聲明中提到,拍拖期間承受很多壓力,一直被傷害及冠以很多大大小小罪名,他們的愛不像自己想像中堅固,決定和平分手。

但實情是在內地愈來愈紅的陳偉霆,一年前已經開始密謀撇阿 Sa,加上今年初與大陸當紅花旦趙麗穎拍劇,啜出真感情,男方開始以忙做藉口,逐漸疏遠阿 Sa,近半年,更全面禁止女友送上門返大陸探班,成功設局,令阿 Sa答應分手。

阿 Sa自撐

五年情玩完,阿 Sa(蔡卓妍)在星期一(二十一日)首度開腔講分手時,仍然幫住前度陳偉霆( William):「絕對冇牽涉第三者,從頭到尾都冇。(因為聚少離多導致分手?)係,因為大家都忙,處理呢啲壓力要時間,暫時我同佢都冇時間,所以咁樣舒服啲。」

有指 William在內地爆紅,就同阿 Sa分手,打完齋唔要和尚。但阿 Sa死撐:「我好清楚佢為人,佢唔係一個壞人。」當被問到有否覺得可惜,阿 Sa似乎對同 William復合仍存有希望:「一切順其自然,由上天安排。」



近年長駐大陸的 Mani,為了阿 Sa同 William分手,都專登返回香港,在訪問途中多次想中斷訪問,怕阿 Sa講多錯多。

最近兩人為《蜀山》宣傳,時時刻刻都出雙入對。

之前陳偉霆同趙麗穎同台演出,兩人在彩排時都手拖手。

在錄影內地節目《快樂大本營》, William同趙麗穎鏡頭後經常密斟咬耳仔打情罵俏,當其他人透明。

趙麗穎同 William好玩得,在化妝期間扯起 William的頭髮。

在錄影內地節目《快樂大本營》, William同趙麗穎鏡頭後經常密斟咬耳仔打情罵俏,當其他人透明。

唔肯幫手解圍

其實阿 Sa同拍檔阿嬌(鍾欣桐)一樣,「好天真同好傻」!據了解,今次分手是 William向阿 Sa提出,由被黃曉明寸爆「我不知道陳偉霆是誰」,到憑內地劇《古劍奇譚》一炮而紅後,阿 Sa就被 William的 fans密集式攻擊,嘲諷她結過婚又年紀大,完全配不上 William。

隨住男方愈來愈紅, fans惡意攻擊有增無減,明知阿 Sa好在意,偏偏 William唔敢出面勸停,驚得失班米飯班主,自私自保,其實是策略。由最初叫阿 Sa忍,到最近四個月, William開始向阿 Sa提議雙方不如暫時分開,等自己在國內再企穩腳,到時不用再擔心 fans反對,才復合再一齊。

「阿 Sa梗係唔想分手,由頭到尾佢都好愛 William,愛到不得了,不過 William講咗好多次,話咁係為佢(阿 Sa)好,唔想佢咁大壓力,又話想趁呢幾年再衝,叫阿 Sa俾啲時間佢同等佢;最後阿 Sa無奈答應, William即刻搵人度好晒封分手聲明,仲搶先(五分鐘)喺微博公布,阿 Sa無得反口,只好跟住宣布分手。」阿 Sa身邊人說。



阿 Sa同 William約定,每年都會抽時間,最少同對方去一次旅行,拍拖初期兩人就被影到去泰國拍拖,但今年 William卻以冇時間為由,拒陪阿 Sa。

一○年阿 Sa同 William拍《華麗密令》,因為一啜傾情,搞到男飛女友 Angelababy,女撇老公鄭中基。

一三年 William在橫店拍《古劍奇譚》,阿 Sa專登飛上去探班,更陪他住二百蚊晚賓館。

去年 William生日正日,阿 Sa特別飛到北京,在酒店內逗留廿四小時,同男友慶祝。

拍《蜀山》 William同樣與趙麗穎有嘴戲又有床戲,結果再次嘴出感情,又要同正印分手。

因為阿 Sa同 William都是在十一月生日,以前兩人經常一齊搞 party慶祝。

今年金像獎。阿 Sa獲提名影后,賽前她非常緊張,原本 William答應返港陪她,但最終都放飛機,當晚由任達華陪她行紅地氈。

漸進式疏遠

分手早有部署,今年初, William與趙麗穎合作拍《蜀山戰紀》時,已不時以忙為藉口,開始疏遠阿 Sa。以往每逢農曆新年,二人都會一齊放假出外拍拖旅行,今年 William要開《蜀山》,大條道理攞唔到假,要臨時甩底。原本阿 Sa想上橫店探班, William卻一口拒絕,阿 Sa最後惟有搵阿嬌陪,同到馬爾代夫過年。

「 William長期喺大陸開工,以前阿 Sa一得閒,就算一、兩日都好,就會飛上去探班;不過近呢半年就算阿 Sa話要去探佢,都會俾 William用唔同藉口阻止,過去呢九個月,見到面嘅時間,加埋都冇一個月。」阿 Sa身邊人說。

三個鐘啜出火

先是漸進式冷淡,令 William付諸行動,向阿 Sa提出分手,最大的推動力是搭上小三趙麗穎。據知,自從 William爆紅後,玩得的他這兩年來,有不少飛來蜢自動送上門,但他玩得好有分寸,始終記得自己是人男友,直到今年一月,拍《蜀山》遇到比阿 Sa更紅、當下國內最火熱的花旦趙麗穎,開工無耐兩人拍嘴戲一拍三個鐘,結果啜出真火,之後再拍床戲,更被讚做得逼真投入。

自此,兩人在片場毫不避忌,開工食飯都糖黐豆出雙入對,更被影到與導演對劇本期間,兩人竟然情不自禁手拖手,人前親密。

同趙麗穎過電一事,有人向阿 Sa通風報訊,但當時 William堅決否認,訛稱是劇組用二人緋聞做宣傳,最後,阿 Sa都選擇相信男友。

不過, William沒有因此收斂,反而更加明目張膽,引薦趙麗穎擔任他有份主持的《十二道鋒味 2》做嘉賓,製造相處機會,兩人更在節目中眉來眼去,攬攬抱抱,非常曖昧。

兩人在對劇本,未正式埋位都手拖住手,十分痴纏。



William引薦趙麗穎上《十二道鋒味 2》做嘉賓,兩人一見面就攬到實一實。

一年分手期票

近半月,因為已經氹掂阿 Sa答應分手, William近期與趙麗穎出席宣傳活動或到電視台錄影節目,都以情侶姿態出現,更被網民偷影到二人在彩排時,忍唔住手拖手的溫馨畫面。

「 William真係好冧趙麗穎,覺得佢好純品又鍾意笑,好善解人意,合作完之後,對呢個女仔讚不絕口。其實喺一年前左右,趙麗穎都未出現, William已經同身邊人講,等自己再紅啲,一定會飛阿 Sa。所以我哋聽到佢哋分手嘅消息,一啲都唔意外,亦唔會好似其他人咁諗,以為佢哋分手係搞宣傳!」 William身邊人說。

星期日晚,阿 Sa搭飛機到深圳機場,面對大班傳媒,阿 Sa雙手合十,未有任何回應。

宣布分手當日,下午阿 Sa在蘇州出席公開活動,強顏歡笑。

宣布分手前的下午, William都有現身,當日他全程扮哀傷神情。

近年 William的強國粉絲,不斷在兩人的微博攻擊阿 Sa,指阿 Sa同鄭中基結過婚,又拍三級片,襯唔起 William。

收視女王

現年 27歲的趙麗穎,河北人, 06年參加雅虎搜星入行後,於千萬廣告大片《跪族篇》擔正女主角,被華誼兄弟睇中簽約,拍過《金婚》、《春去春又回》等劇。 11年趙麗穎簽約海潤影視集團,接拍《新還珠格格》飾演晴兒一角大受注目,人氣開始上升。

直至 13年,再憑內地劇《陸貞傳奇》一爆而紅,收視率破 3成為榜首,趙麗穎知名度激增,成為人氣花旦;去年更榮登《福布斯》中國名人榜前 80名,其後播出的《彬彬來了》、《花千骨》,套套收視高企,成為新一代收視女王。

當年拍《陸貞傳奇》趙麗穎與男主角陳曉傳過緋聞,現在男方剛與陳妍希公開戀情。

開騷就出事

好邪! Twins每逢開演唱會前都出事,包括阿嬌淫照,阿 Sa失婚,全部爆在開 show前,多災多難。

淫照事件

08年, Twins原定於紅館舉行演唱會,因阿嬌爆出淫照風波被迫取消, Twins進入冰封時期,阿嬌暫別幕前,阿 Sa踏上「二缺一」之路。

公布離婚

解體兩年, Twins 10年正式復合,於紅館開三場《 Twins人人彈起演唱會》,開 show前,阿 Sa突然爆出 06年與鄭中基秘婚,二人召開記者會交代,同時宣布曾結婚及離婚消息。

借女上位

入行多年,一直不紅不黑的陳偉霆,鍾意利用戀情做宣傳,靠女友上位。去年憑內地劇《古劍奇譚》爆紅,吸金力十級跳,事業開始超越女友阿 Sa,即撇。

蔡卓妍

09年,陳偉霆拍電影《美麗密令》時,已背住女友 Angelababy偷嗒當時已經走紅的蔡卓妍,更秘租愛巢半同居,女尊男卑。及後阿 Sa被爆曾與鄭中基秘婚, William第一時間拖阿 Sa大方公開戀情,劇情急轉直下,轟動一時,做了阿 Sa男友後, William知名度及工作機會大大飆升。

Angelababy

07年,二人合作兒童節目搭上,當時紅人一大截的 Baby,經常與 William情侶檔出席品牌活動,帶挈男友搵錢。

撰文、攝影、攝錄:娛樂組

nextplus.nextmedia.com

鍾意就快D Share啦!