探熱針
賺得番：古仔吳彥祖拍住上 胡杏兒識揀
殼王陳國強破紀錄開出三千六百萬三年，誠意價留胡杏兒，但最終不敵蕭定一，二千四百萬已將視后撬走；有自由話事權外，最重要是承諾開拓電影事業。話口未完，新老細已為胡杏兒接下林嶺東執導的《迷城Ⅱ》，同兩大型男古天樂、吳彥祖做對手戲。
冇人會嫌錢腥，胡杏兒賺少千二萬，但隨時得到更多。
新主有口齒
胡杏兒結束無同綫十六年的賓主關係，正式轉投蕭定一旗下，有指殼王開出銀彈留人（比蕭定一多一千二百萬），視后卻不為所動，會惹來封殺。
「 TVB有自己政策，呢個我明白亦理解，唔會介意。」胡杏兒坦言轉公司後自己有話事權外，蕭定一更承諾為她度身訂造劇本，開展電影事業。
講得出做得到，轉會不到一個月，胡杏兒已落實參演林嶺東的新片《迷城Ⅱ》，和吳彥祖、古天樂、黎耀祥、張孝全合作。
「林（嶺東）生的戲一向都係男性做主導，女主角戲份未必多，但有得發揮，又可以同古仔、 Daniel（吳彥祖）做對手，都係個好開始。」一名劇組人員說。
抵用有優勢
藝人離開電視台，不外是北上賺人仔或進軍大銀幕兩條路，但電視電影兩個世界，成功闖關，近年少之又少；人辦有佘詩曼，拍劇再叫好叫座，但過去孭飛的電影，成績都好麻麻。
「杏兒起步遲，但之前佢拍過杜琪峯嘅《奪命金》，又孖住影帝張家輝同 Sammi合作《失戀急讓》，外間對佢嘅反應都唔錯，加上來來去去都係嗰幾個女主角，杏兒喺影圈有新鮮感，片酬平五十萬有找，所以都有優勢。」電影公司人員說。
余文樂消失
《迷城》上畫不久，林嶺東拍板開《迷城Ⅱ》，同杜琪峯一樣，向來喜用自己班底的林導，愛用古天樂，亦對合作過一次的張孝全讚不絕口，兩男有份冧庄，今次還加入同古仔合作慣的吳彥祖，以及視帝黎耀祥，有指余文樂因為太多聲氣，又投訴導演要演員冒險搵命搏，《迷城Ⅱ》自動消失。
我要逃亡
無綫開劇工廠制，公司又規矩多，小生花旦愈做愈無癮，紛紛逃亡，另覓生路。
撰文、攝影、攝錄：娛樂組
nextplus.nextmedia.com
|
鍾意就快D Share啦！
|
|
|
