24歲嘅賭王索爆千金何超蓮，自從回復單身多戀事，重投愛情市場嘅佢裙下之臣輪流轉，有傳內地百億家底富二代劉根森、霍震霆個仔霍啟山都加入爭蓮戰團，繼聖誕日超蓮孖劉根森遊勻珠海同中環，原來兩日後已華麗轉身，去到廣州同啟山撐枱腳，被本報讀者「爆相」捕獲，兩人着黑色情侶裝食嘢，叫到一枱餸，超蓮仲攞手機同啟山分享內容，似乎情非泛泛。有樣有身材有腦嘅超蓮，本月初狠撇疑劈腿嘅吳克羣，回復單身貴族即成搶手貨，裙下之臣都係家族來頭甚猛嘅有錢仔，早前傳出霍英東孫兒霍啟山向超蓮發動猛烈追求攻勢，但一直只聞樓梯響。今日讀者鄭先生透過本報「爆相爆片」報料，27號喺廣州野生捕獲超蓮同霍啟山撐枱腳……去廣州撐枱腳？鄭先生話：「27號下晝大約2點半左右啦，喺廣州天河區嘅炳勝中菜館，見到佢哋兩個入嚟食飯，有架掛廣州牌嘅新款七人車喺外面等。佢兩個坐得好埋，超蓮喺度玩手機，兩個人叫咗成枱餸食唔晒，埋單時侍應攞咗啲外賣盒嚟，超蓮就自己企起身打包，嗰個男人就負責畀錢。」聖誕日當日超蓮先至去完珠海長隆橫琴海洋王國孖劉根森玩機動遊戲，兩日後就改為同啟山上廣州，好忙咁喎！其實早喺本月初，已傳啟山落力出招狂追超蓮；而甚少出席名人活動嘅啟山，收風知超蓮會現身羅傑承投資嘅餐廳周年活動，嗰晚啟山罕有出席希望扮「偶遇」，可惜等了兩個鐘超蓮仍未有現身，啟山先冇癮走人。幸好皇天不負有心人，本周日啟山終得償所願，同心儀嘅女神超蓮喺廣州單對單撐枱腳，反觀聖誕日劉根森跟超蓮同遊珠海時，身邊仍有幾位友人同行。《蘋果》今日聯絡超蓮，可惜到截稿時仍未有回覆，佢媽咪三太陳婉珍嘅私人助理Sandy代回覆話：「超蓮27號係上咗廣州，佢同啟山傾生意，因為何太喺廣州有個哥爾夫球場project，超蓮o依家幫屋企打理生意，嗰日佢哋係傾公事。」問點解搵啟山合作？Sandy話：「霍家喺內地發展好耐，啟山幫家族喺內地發展生意，如果傾得成會公佈project。」問到超蓮同啟山係唔係拍拖？佢話：「何太話一定唔係，佢哋係朋友、世交，唔係拍拖。」
|
鍾意就快D Share啦！
|
|
|
