真人騷
永遠的海潮 不老的傳說 49歲溫碧霞：因為我膊頭靚囉！
話說《哪一天我們會飛》本來叫《愛的根源》，臨門一腳導演覺得有點兒離題，結果改咗戲名。
嗰頭黃修平向譚詠麟致敬不成，呢頭還有套《愛在深秋》上畫，監製兼女主角溫碧霞話原來又唔關譚校長事，係男主角同小三、女主角同的士司機嘅四角忘年戀都發生在深秋，純屬貼題喎。
戲要等到新年過後才有得喺戲院睇，先預覧了劇照，果然靚人靚景、紅葉紛飛，是真的貼題！而 49歲的溫碧霞也一點沒有辜負大家期望，亦都果然每個鏡頭都見靚膊、妝都一絲不苟地化到靚一靚，甚至還紮了孖辮、穿了熱褲，由廿𡃁演到四十歲，怎麼看，都還是 23年前那個海潮，一點沒有走樣。
戲中如是，戲外也如是。訪問這一天，三套她自備的衣服，不是跌膊就係露膊，看她及腰長髮梳得貼貼服服，嫵媚搖曳地走出來。我和攝影師都嘩嘩聲，忍唔住要問：「點解一定要露膊呢？」
她笑咪咪地說：「因為我露膊靚囉！我係鍾意咁㗎喇，咁點吖？」
其實都有意外，見識了不少別的行內同一輩美魔女，唔多唔少都醫學美容過、甚至落咗重手有點兒膠，反倒是出名貪靚嘅溫碧霞，鏡頭與美圖秀秀以外， 49歲該有的痕跡都在臉上，一點沒有加工、不見掩飾。我又忍唔住問：「既然貪靚到咁，既然呢行個個都有做，點解你又唔去加工嘅？」
她還是笑咪咪，一點不覺得被冒犯：「啲人睇住我大㗎，我一做手腳，咪係人都知？我唔敢搞太多，都係自然啲好。」
先不說自然與造作，溫碧霞是怎麼定義和拿捏的，我只想說， 49歲，還能這麼固執自我、還是能從骨子裡散發出小女生味道，這才是溫碧霞，這才是她的獨特之處。
15年前，爭啲結唔成婚。
點解會做電影監製？
成立自己電影工作室一直係我夢想，一直以嚟做演員，都覺得演員好被動，呢十年香港好似好少愛情片，但係明明又好多女性鍾意睇愛情片……所以兩年前導演請我主演呢套戲，我就提出不如合作。後尾籌備劇本都大半年，到準備好已經係深秋，所以套戲我哋最終改咗叫《愛在深秋》。
第一次唔只係演員，仲攞埋錢出嚟拍，壓力大唔大？
其實英皇同我一齊合作，好彩楊生都好支持我……做每件事我都唔鍾意俾自己太大壓力。當呢個係夢想，純粹就係想拍啲大家想睇嘅戲，我冇諗太多……當然人人都想票房好，最近我睇好多人睇完試片，個反應就係我想要嗰樣，我覺得好有信心喎。
怕唔怕呢？《愛在深秋》呢個戲名，吸引唔到後生觀眾？
我冇諗過係唔係歌名，係真係拍嘅時候喺桂林深秋，覺得貼題咋……好舊咩？我唔覺喎，我淨係覺得好易記得，人哋聽咗會覺得好浪漫咋！其實我套戲係話一段婚姻走到一個位冇咗激情，我想搵番佢，點知錯摸地發現佢有第三者。我出走時又遇到一個年輕過我嘅的士司機……我想話愛情無分年齡身份，鍾意就係鍾意。
結婚十五年，你自己嘅婚姻呢？
我係好在大家都好忙，佢做嘢要周圍飛，我一拍戲又係走個幾月，可能因為見面嘅時間少，所以我哋都好珍惜相處嘅時間。
你喺調景嶺大，當年因為你爸爸係老兵、佢爸爸係國民黨名將，呢個婚都爭啲結唔成？
本來鍾意就係鍾意，但係的確有段時間，因為佢家族太大，我聽到一啲說話唔係太開心，有人話我哋唔會有好結果、又有人話我哋兩個世界，佢應該搵個啱佢身份嘅女仔……當時係我提出，既然係咁不如分開，但就係因為分開咗，大家先至知道對方有幾重要。亦都係因為分開，佢向我求婚，同我講佢鍾意嘅係我，永遠唔會介意別人口中點講我……
咁就過咗十五年，今年有冇特別慶祝？
走唔甩都係蠋光晚餐嗰啲，佢又會成日俾驚喜我，知道我鍾意陽光海灘，就成日製造驚喜假期俾我。我覺得最難得最窩心唔係咩驚喜咩禮物，係我開心唔開心，諗緊乜嘢，佢永遠都明，永遠都會知，呢啲好緊要，無論我做啲乜嘢，佢都會支持我。
佢乜都睇得穿，咁做你咪好攰？
當然都有唔開心嘅時候，有拗撬嘅時候，但係我份人唔鍾意嗌交，一有唔對路就會走咗去，揸車出去行下。好彩佢都係嗰啲好有教養嘅人……但係都有段時間，好似對方講咩都唔啱聽，點睇都唔順眼，好彩，嗰段日子已經過咗……
嗰段日子即係幾時？
我記得真係結婚七年，我仲諗緊真係七年之癢，嗰段日子我避一避去咗拍嘢，走咗去原來又會好掛住喎……
劉華同初戀，我揀咗初戀。
細個屋企地方細人又多（八兄弟姊妹），十六歲就出嚟拍戲未停過，會唔會因為咁，當有自己嘅家，特別珍惜？
可能真係咁，我識佢之前從來冇停過，拍戲拍劇又唱歌，幾乎冇時間生活。直至遇到佢，先至發覺，應該要停一停，應該要享受自己嘅生活。我入行咁多年，唯一停咗兩年就係同佢結婚以後，之後雖然都係好恨拍戲，都係會出返嚟，但係心態已經同以前唔同，因為我有個家，開始識得揀嘢做。
調景嶺嘅生活仲記得幾多？
雖然嗰陣時好窮，啲石屋都係國民黨老兵自己搭，但係我真係好懷念好懷念，因為有山有水，所有人感情好好，一到雙十節周圍掛晒青天白日旗，好好氣氛……不過爸爸當兵，管我好嚴，唔俾出夜街，唔俾男仔打嚟搵我，反而搞到我好反叛，一大個就好想快啲出去睇下出邊嘅世界。
離開以後同屋企人感情呢？
都仲係好好，媽媽幾年前過咗身，爸爸就死咗十幾年，雖然父母唔喺度，但係我同所有哥哥姐姐感情一樣咁好。我八個仔女排最細，所以慣咗由細到大俾人錫俾人照顧永遠長唔大，入咗娛樂圈，一出道就做女主角，然後就遇到我先生，真係好幸福。
不過圍繞你唔係只得屋企人同好人，入行咁多年，總有遇過壞人啩？
梗係有……不過有啲嘢我唔想記住，反而令我最唔開心，係爸爸心臟病離開嘅時候，係我最忙嘅時候……佢死第二年，我識咗我先生，我覺得佢喺我最傷心最低潮嘅一年出現，亦都某程度上係代替咗我爸爸。
你拍《停不了的愛》到底有冇同劉德華真係撻着？
我細個鍾意佢係真嘅，佢太完美喇，我當年對佢真係心動，好難唔心動。我同佢食飯，佢好到叫出面等嗰啲 fans一齊食㗎，佢對人太好喇，對所有人都太好，但係我對 Artists好冇信心，你諗下佢當年幾忙？如果同劉德華拍拖，見唔到佢有幾辛苦？同埋我當時拍緊拖呢，都要控制下自己。
當時男朋友唔係呢行？
唔係㗎，佢喺第二度讀書返香港，唔係呢個男朋友，我諗我當時真係會愛上劉德華。呢個男朋友我哋一齊七年，佢想結婚，但係我太細，對婚姻太無信心……
點解咁細個已經對婚姻冇信心？
因為爹哋花心囉，除咗媽咪有幾個女人囉…… anyways，我冇可能跟呢個初戀男朋友返加拿大，佢走嘅時候都好 hurt。
我係鍾意露膊吖？咁點吖？
呢個年紀嘅女星好多都有打針有加工，我又估你唔到，出名貪靚，又冇諗過去打下針去下皺紋嘅？
啲人睇住我大，我做咩手腳，咪係人都知？唔敢搞太多，都係自然啲好。
亦都有好多人關心，點解一定要着露膊衫呢？
因為我膊頭靚囉……哈哈，講笑啫……有啲衫係咁樣着靚呀嘛！我覺得做人唔需要刻意改變，因為人哋話我成日咁，唔通我就要改變咩？我淨係想做番自己。我包到實一實咁走出嚟，你哋咪仲會覺得怪！我係咁㗎喇，咁點吖？
講下囝囝，第一面見佢仲記唔記得？點解會揀咗佢呢？
其實冇得揀，當時我哋喺國內申請領養，唔係我揀，係佢哋派，呢啲係緣份……一寄張相嚟，我已經鍾意咗佢，嗰年佢一歲都未夠。
佢嘅背景你知道幾多？
我知道佢係俾人掉咗喺火車站……並唔知道爹哋媽咪係邊個。我覺得好 amazing，佢當時一歲都未夠，但係佢記得晒喺孤兒院第一面見我哋係點，第一次跟我哋返屋企又係點……我諗諗下，人呢，愈係傷痛記憶愈深刻，就好似我以前俾媽咪賣，我都永遠記得嗰一幕。嗰年我又係三歲，屋企環境差，媽媽帶我去見一個叔叔。
我好記得喺茶餐廳，個叔叔喺枱面遞過嚟一疊錢，然後我拉住媽咪隻手係咁喊，我喊媽咪又喊……結果個叔叔見到我哋咁，留低咗啲錢，叫我媽咪帶我返屋企。太難忘啦，所以我好細個就對人冇安全感，同埋要發奮，一定要搵多啲錢。
你幾多歲已經養得起成頭家？
拍完《𡃁妹仔》我去咗讀書，到 21歲再出返嚟拍戲，已經可以養起全家。
囝囝𠵱家幾多歲，你又點知佢記得？
我問佢，知唔知自己係收養，佢話知，佢仲記得嗰日我行到去邊佢就望到去邊喎、又記得返屋企嗰日我隻細狗想咬佢喎！我又問佢，想唔想爹哋媽咪帶佢返去探下孤兒院啲小朋友？佢嗰番說話令我好感動：「我唔想返去，我唔想再冇爹哋媽咪……」聽到我毛管都戙，佢咁細個嘅生命受到咁大創傷，聽到我心都軟晒……
所以呢一刻，再有人問到甚麼親唔親生，係唔係好多餘？
佢病，佢跌親，佢唔開心，我會赤㗎，仲問係唔係親生，我真係覺得好多餘。呢個小朋友，帶俾我太多快樂同感動，我睇到佢好有希望，將來會過得好好。
冇火的玫瑰
一見溫碧霞，硬係忍唔住細看她的膊頭，硬係忍唔住不停講膊頭。睇睇下，又真係白白滑滑好靚，最後一輯相片，我跟攝影師說：「後記影大頭啦，我想見到多啲膊頭！」
沒想到溫碧霞聽錯了：「吓？影大膊頭？淨係見到個膊頭？」然後溫碧霞笑了，在場的也全都笑了。其實火玫瑰一啲火都冇，仲幾講得笑添！
撰文：朱小博
攝影：范仲良
化妝： Katherine
髮型： Ken Ng@Alchemy
場地提供： My Seasons
|
鍾意就快D Share啦！
|
|
|
