96年港姐冠軍李珊珊，4年前曾傳出腦腫瘤，近日有周刊再報道珊珊患腦瘤消息，經常要進出醫院，而佢接受《蘋果》訪問時，就否認有關報道，只係話「唔係事實唔回應！」近年深閨簡出嘅珊珊，08年開始已鮮有現身公開場合，只以微博或者短訊同朋友溝通。噚晚珊珊喺微博先後兩次貼文，其中喺第一篇長文中，珊珊透露自己喺呢5年入面，原來一直構思一個喺港姐選舉中，史無前例嘅義舉——拍賣香港小姐后冠，並會將所得款項，不扣除成本，全數捐俾6個慈善機構。20年前6月2日，李珊珊在紅館摘下港姐冠軍寶座，更是四料冠軍，包括最上鏡小姐、最受傳播媒介歡迎獎及才藝小姐。文中珊珊憶述20年前港姐決賽當晚心情，最終更奪得冠軍。佢喺文章中形容拍賣后冠嘅原因，係希望將佢嘅價值變得更有意義，即使自己拍賣出去，亦唔會帶走所得嚟嘅名聲，反而收起盒裡，后冠就同一堆廢鐵夾雜小石頭冇分別。珊珊寫道：「而我亦不認為需要血緣去計承下去，因為我的腦袋及身軀是父母給我，並不代表我也能將好的腦袋及好的身軀傳承到後代，所以在繼承上是一點意義也沒有。還有一點就是我的生活尚算豐足，不過跟富貴扯不上關係，然而我深知人生無常，一切高低起跌皆是命，因此我作出了這個決定，不論將來我是潦倒、窮困、小康、富貴；我也不會後悔。」珊珊喺文章中，坦言呢個構思，已經諗咗五年，亦預咗會惹嚟抨擊嘅聲音，但佢唔會因為其他人嘅質疑而卻步，因為呢個唔係佢一向嘅性格。
來源 source: http://hk.apple.nextmedia.com
|
鍾意就快D Share啦！
|
|
|