【《蘋果》專訪】劉錫明被叫毒瘤明：有嬲過
惡毒說話猶如利刃，90年代演藝事業發展如日中天的劉錫明，因公開承認對周慧敏有好感，被周慧敏男友倪震公器私用，以旗下暢銷雜誌《YES！》連續三年唱衰，更冠以「毒瘤明」之名，最後被迫敗走台灣發展。膠着的17年恩怨，由倪震2008年表達歉意而淡化，到劉錫明接受《YES！》邀請出騷而化解。劉錫明昨日受訪時表示當年被叫毒瘤明的確有嬲過，假如有機會見到倪震，會跟他講「祝佢身體健康。」
現年51歲的劉錫明今晚應邀在灣仔會展出席「YES！25週年演唱會」，重踏香港舞台，更會大唱當年經典金曲，昨日他在會展接受《蘋果》專訪，大談當年跟周慧敏一段情的「秘密」，他說：「當年周慧敏係玉女，好多人都對佢有好感，我有好感完全唔奇，我當年二十幾歲，都係小鮮肉，有少男情懷，好正常，但撻着就真係冇嘅，追求都要講緣，我哋之間完全冇嘢發生過。」
■劉錫明昨日接受本報專訪時，提到在街就算被人叫「毒瘤明」，他都不介意。攝影：陳俊強
未見過倪震劉錫明覺得情侶拍拖好講timing，他始終覺得台灣籍太太張齊玲跟自己最有緣，所以可以共諧連理，結婚生女，目前囡囡已經13歲，一直在台灣生活接受教育。在整個訪問中話題都離不開當年「情敵」倪震，劉錫明全程都處之泰然，畢竟是二十多年前的事。他回想當年突被叫「毒瘤明」的感覺：「當年有嬲過，我都年少氣盛啦，但我自問係冇隔夜仇。我反正身體OKay，仲未有惡性腫瘤。」倪震早年跟周慧敏結婚時，曾公開對劉錫明的歉意，假如跟倪震重遇，心底的說話原來只是這樣一句：「祝佢身體健康，有健康就乜都唔使擔心，唔使愁。」劉錫明自爆事情發展到今日，跟倪震是未見過一面，亦根本不認識對方，他說：「我未見過倪生，純粹係美麗誤會。」在事情發生後，劉錫明甚少在港露面，回來都只是探望母親聚天倫，完全沒有機會接觸倪震跟周慧敏兩夫婦。
■昨日綵排，劉錫明只花了十多分鐘便完成。
■90年劉錫明與周慧敏拍《烏金血劍》後，便開始「毒瘤」噩運。劇照
「人生冇如果」自言是「Yes Man」的劉錫明，凡事都很順得人，永遠不會托人手踭，他說：「做人蝕底少少唔怕，最緊要係蝕得起，我乜都只會向前看。」如果有一日在街給人大叫「毒瘤明」，他笑言不會因此不開心，更會跟對方說：「Hello，多謝。」多年閱歷令劉錫明更睇得化，他說：「何必要介懷，人生仲有好多重要事。」問到有否覺得如果當年沒被倪震玩殘，今日在香港的演藝成績一定不止於此，他無悔說：「人生冇得如果，有早知就冇乞兒，即使plan好，分分鐘都會因為一件事，甚至一個電話打亂晒，做嘢最好順其自然。」
而昨日劉錫明綵排時，他都唱得非常認真，接連唱出《是緣是債是場夢》和《你怎麼捨得我》兩首歌，綵排十多分鐘便完成，樂手即拍掌向他致意。
採訪：楊定
攝影：陳俊強
■倪震以旗下刊物（右圖）連續攻擊劉錫明三年，到與周慧敏結婚時，才向劉道歉。資料圖片
■轉往台灣發展後，劉錫明落地生根結婚生女，組織幸福家庭。資料圖片
|
鍾意就快D Share啦！
|
|
|