網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2018年1月4日 星期四

超貴新盤,盡慳裝修攻略 [壹週刊 - 1452 - 財經] __,M1,

圖中的大圓桌、座燈及掛畫均由屋主祖屋搬來,擁有一定歷史,以合色調的新傢俬配搭,成功達致新舊融合的效果。樓市熱葷超貴新盤,盡慳裝修攻略回望過去一年樓市, ...






圖中的大圓桌、座燈及掛畫均由屋主祖屋搬來,擁有一定歷史,以合色調的新傢俬配搭,成功達致新舊融合的效果。

樓市熱葷

超貴新盤,盡慳裝修攻略

回望過去一年樓市,一手盤獨贏,不少發展商喊着「月月有樓賣」口號連環推盤,劏房盤都賣過千萬!其中頂層或特色單位更加搶手。

不過,有設計師教路,這類單位雖然屬新入伙,裝修時也不能想點改就點改,一定要保護原先牆身,否則水浸眼眉,令單位滲水漏水。

而新盤裝修亦有招數,配合慳錢原則,務求不浪費新簇簇的交樓素材及用料。

新盤樓價愈來愈貴,俾得起首期,已未必有餘錢豪裝。 E F Design設計總監馮建耀 Eric以數宗個案分享,盡量慳錢方法。其中一宗個案是新界錦田北的「 PARK YOHO Genova」(峻巒 2A期)頂層特色單位。 Eric說:「屋主係一對年紀老邁、由外國回流嘅夫妻,離開香港十幾二十年,想回港共享天倫。」他們入手的頂層特色戶,連天台總面積二千五百多呎,而屋主二人正正「吼中」此單位的開揚景觀,讓他們尋回一絲外國藍天青草的感覺。

多房但則細

「喺香港潮濕天氣下住獨立屋,壞處係會有好多蚊,天冷時都會有!屋主因此選擇頂層單位。而且頂層空氣好啲,景觀更加係兩回事。」單位內置連接天台的樓梯,讓屋主能方便享用兩個戶外空間。而房間大多為落地玻璃,令視覺上變得寬闊。「就咁喺客廳呢層,佢哋已可以透過個大露台,享有一個十六比九、綠油油好開揚嘅景觀。」迎入眼前的是大欖郊野公園以及錦田河之綠意,更能遠眺至深圳樓群。

此頂層單位間隔是四房雙套設計,可惜房多卻不代表實用。「我哋將主人套房同兩個客房打通,變成三合一。」原則主人房連廁所有一百呎,但每間客房只有約三十五呎,在只有兩人居住的情況下可謂得物無所用。打通後空間感足,也更方便放置大床及大衣櫃。 Eric坦言改動間隔是裝修費中的主要開支之一。「而家新盤發展商嘅交樓標準,質素都已好高。呢個盤原則交樓時嘅客、飯廳,以及上天台嘅內置樓梯,都已經鋪咗雲石。」交樓標準所鋪的雲石顏色,屬易襯的米白色,因此只要把屋內設計的主色、材料及質感融入其中,便能「新舊合一」,也能好好「慳住」屋主荷包。故對比打通三房,客廳層的裝修開支,便只需以粉飾為主。





交樓時的天台牆身已做防水層,因此戶主不應改動牆身,改變結構。



做明喉防滲漏

頂層戶的珍貴之處,是其獨享的特大天台。為了一次過滿足屋主的三個願望,天台中的「無形」間隔也要下足功夫。「除咗預留位置燒烤及聚會外,我哋更加留咗空間俾屋主種花。」記者眼見的花槽及樹槽至少有三至四個,深度不淺,種植大型植物絕無難度,配有其他放置於地上的大小盆栽,屋主可以享受園藝之樂。「我另外打造咗個客廳、飯廳以及室外廚房,令整個天台嘅功能性大大提升。」為了應付屋主兒孫聚首一堂、相當熱鬧的情況,單是飯廳已有一張六人大枱,加上有吧枱及客廳的數張戶外沙發,可以容納十五人。

「好多人會喺天台或露台加水喉,用嚟洗地同淋花。但記得一定要做明喉,千祈唔好做暗喉!」 Eric解釋,大廈原先牆身已有做防水層,如裝修不慎鑿穿牆身,首當其衝受難的會是樓下自己單位。同樣地,要於天台或露台鋪上戶外特色地台時,也要有所注意。「鋪地台時一定唔可以封密原先地面嘅去水位,或係要做到微微傾斜,等雨水得以流走唔會水浸。」不少擁有天台的業主也望能有一些儲物位置,這次屋主也不例外,但 Eric提醒:「如果係放於天台嘅組合屋或儲物櫃,記得高度唔可以超過一米半,否則就會觸犯香港法例。」







圖中間的柱位為原則兩房的分隔位,惟客房太細不太見使,屋主因此決定打通成一間大套房。





天台空間感十足, Eric特意放置一張八人大沙發打造成戶外客廳,以方便屋主聚會。

私人大堂較陰暗

另一個超貴的裝修單位,是何文田的「天鑄 2期」,是次裝修的一千五百呎單位位於高層,「一出升降機到呢層大堂,其實已係屬於此單位嘅實用面積,而呢個大堂交樓時已做得幾貼心,設有鞋櫃同長椅喺外面,俾屋主換鞋。」大堂約有一百呎,雲石裝修雖然甚為雅致,但牆身為深灰色。「燈光上係較為暗,變相如果進入單位後都咁暗的話,我認為係有改善空間。」要於不改動及更換大堂裝修下,改變幽暗環境, Eric由單位入口的偏廳着手。「入口位置原本係深色檀木地板,我改為淺色嘅歐亞木紋雲石地面,令整間屋於較陰暗嘅層次上增添番啲光澤,其他就保留原狀。」

原本屬偏廳的空間,也改變為玄關位,並設吧枱配合交樓贈送的酒櫃,形成歡迎客人的小地帶。「唯一要處理嘅,係要襯番原先交樓標準嘅素材,一般做法係撞色或襯番色,而今次張吧枱正正係用番同發展商一樣嘅雲石。」 Eric指搜尋過程需一定時間,要找到完全相同的物料並非易事;而是次採用的石材名為巴菲特灰,生產地為土耳其的石礦場。







香港發展商於十多年前興起「玻璃屋」的設計,近年連飄窗(呈矩形或梯形向室外凸起的三面玻璃)也已成落地設計。





發展商於大堂位置以深及淺灰色的雲石作混搭,感覺雖然優雅,但略嫌太陰暗。

中國人忌無依靠

訪問當天單位露台門長開,環境比想像中安靜,收音也不需顧忌。加上半邊單位也是落地玻璃,開揚得連燈也不用多開,但這類「玻璃屋」也要有所犧牲。「主人房前後都係玻璃窗或窗台,而另一面已係房門同廁所,變相只得一面牆去設計。」 Eric分享其經驗指,中國人多喜歡有所依靠。「唯一一面牆當然要做衣櫃,床頭唔係對住廁所,就係對住玻璃窗。」選擇後者的屋主會要求以一對大趟門代替床頭窗簾去開關,避免睡覺時有空蕩蕩的感覺。

如果單位位於西面的話,夏天時更會被曬至「熱辣辣」, Eric指太陽曬進來時,屋內最盡頭也會感受到熱氣。「窗簾要選擇防紫外線嘅物料,或喺窗上貼上防曬紙擋一擋 但重要係空調設備要夠。」他指以往居住的單位向正西北位,客廳大約有三至四百呎,已需要三部兩匹的冷氣機坐鎮。一屋難有百優,惟有下苦功,讓安樂窩變得更舒適。





Eric把玄關位的裝修用色調淺,而吧枱的石材正好配合身後交樓標準的巴菲特灰雲石,以達一致性。



撰文:黃綺敏

攝影:梁正平

ed_bn@nextdigital.com.hk


鍾意就快D Share啦!