探熱針
瞓床 2個月 葉翠翠宣布佗狗 B
葉翠翠去年四月為老公周曉東誕下小王子周津羲，兩公婆有子萬事足，葉翠翠除做 KOL外，全副心機照顧囝囝。據知有意生多一個的她，今年十月再造人成功，今次佗 B血壓低，她冇胃口兼要瞓足兩個月床，幸好向來注重保養，不單未有影響磅數，十週 B已經比標準 size大，跟小王子一樣健康有分量。
拖實老公
上週四（十二月二十八日）下午，葉翠翠孖老公同小王子到星街 high tea，著住大褸的她，雖然身形未有明顯變化，但面部略為浮腫，行路姿勢充滿孕味。原來，佗 B初期，她因血壓低經常頭暈要在家休息，就算身體狀況回復正常，她依然小心謹慎，落車後行去餐廳的一段路，幾乎全程拖實老公。
入到餐廳，葉翠翠放鬆晒，跟老公邊食邊講，其間又餵小王子飲水，九個月大的小王子雖然有得睇冇得食，但依然開心玩紙巾。
「翠翠佗第一胎時，都係過咗三個月先通知屋企人，今次都係一樣。佢佗 B初期，血壓低要瞓床，就連食飯都試過喺床度食，兩個月冇出過街，除咗因為應承朋友做剪綵嘉賓，十一月中稍為扮靚出過去，一直都喺屋企。」知情者說。
未知仔定女
求證葉翠翠佗 B，現在行動自如，可以外出的她開心承認：「我哋未知係仔定女，老公希望第二胎係仔，我就鍾意女，所以生女生仔都一樣開心。」
佗第二胎，葉翠翠慶幸生完小王子後，一直有調理身體做足準備功夫，所以瞓床兩個月，完全沒有影響健康，第二胎依然比一般標準 BB磅數重。
「我佗 BB時會特別注重飲食，除咗個胎健康，出世後都會容易湊，好多媽咪都話睇我嘅 Facebook，跟住我嘅食療，生出嚟嘅 B都好長肉。」她說。
靚媽 KOL代表
向來對護膚扮靚有心得，早已儲了一批粉絲的她，榮升人母後又極速修身，加上小王子得意可愛，葉翠翠近日成為靚媽 KOL界代表。
「有一間台灣網絡平台搵我傾合作，原來嗰邊好興意見領 A，類似 facebook咁分享自己心得，不過就要俾錢入會做 member先睇到，佢哋睇中我有唔少媽咪粉絲，覺得可以搵我做其中一個意見領 A。其實有咁多人睇我嘅嘢，我已經好開心，事關最初同人分享自己經歷，係希望幫到人，估唔到反應咁好，呢啲都係 bonus嚟啫。」她說。
Jessica C
Jessica C跟打星安志杰（ Andy）於 2015年 10月在馬爾代夫訂婚， 3月女兒 Tessa在美國出生，去年 10月他們才在夏威夷正式結婚。 JC早前宣布再做媽咪，懷孕 3個月， Andy認為是上天送給二人的聖誕禮物，男或女也沒所謂。第二任媽咪心情興奮，懷孕初期沒胃口進食，清減不少，希望現在適應後食多啲補充營養。
方晧玟
去年 5月與日籍模特兒安田慎吾結婚的方皓玟，上月底在 Instagram貼了一張超聲波照片，宣布好消息，她留言「感謝上天給我的禮物， It's a boy」。今年 7月是預產期的她收到好多朋友祝福，並表示會留港生產。
撰文、攝影：娛樂組
|
鍾意就快D Share啦！
|
|
|