克勤今年出道三十年，講到明要橫掃頒獎禮。
探熱針
頒獎禮去足廿八年 50歲李克勤獲頒「樂壇關愛座
今年的樂壇頒獎禮真係慘不忍睹，在上星期六晚 TVB舉行的《勁歌》頒獎禮，全部「星夢」自己友同劇集歌玩晒，唯一係得李克勤一個唔係「星夢」歌手可以奪得大獎「最受歡迎歌手」。
不過無計啦，克勤叔叔今年加入樂壇三十年，難得佢仲恨爭獎，唔介意同班小朋友一齊玩，一班樂壇後輩當然願意讓出「關愛座」俾克勤坐
真係咁恨獎？
李克勤今年五十歲，加入樂壇剛剛三十年，正當同輩歌手陳奕迅、容祖兒都唔再出席頒獎禮攞獎時，李克勤竟然仲要講明會出席晒四個頒獎禮，在《勁歌》頒獎禮上，他連掃四個獎，兩首金曲、「金曲金獎」及「最歡迎歌」獎，以資歷計，克勤當然受之無愧，但係見到企喺隔籬的五強，唔再係以前的四大天王，或者是全盛時期的陳奕迅同古巨基，而係胡鴻鈞、周柏豪、鄭俊弘及菊梓喬，四個人的年資加埋都唔夠他的三十年多，難怪被網民留言喪笑，又封他做「樂壇關愛座」。
數數手指，原來克勤由八九年開始就喺頒獎禮上開始攞獎，第一個金曲獎係《一生不變》，之後無間斷出席樂壇頒獎禮，玩足廿八年，經歷幾個朝代都未厭，比起陳奕迅二十年，容祖兒十七年及劉德華十六年，克勤真係好鍾意攞獎。
自己友玩晒
近年《勁歌》頒獎禮都預了是「星夢」頒獎禮，全晚頒了三十八個獎，「星夢」佔了十五個，其中胡鴻鈞奪三獎，及菊梓喬奪四獎，一哥周柏豪全年只得《天網》一首歌，同埋譚嘉儀首《陪着你走》都要一晚唱兩次，而坤哥雖然都是 TVB親生仔（經理人合約），但唔係星夢自己友，所以只得一點五個獎，連入「最受歡迎歌手」五強都無資格。
要靠外援
由於今年大部分一線當紅歌星，都唔出席頒獎禮，所以電視台同電台都要搵外援幫手，由於今年叱咤三十年，所以大條道理搵陳奕迅做表演嘉賓，但最驚喜就係連謝霆鋒都請得郁，仲要唱番佢當年 MK rock經典《活着 VIVA》，真係不得了。
而 TVB都有搵外援，叫咗五個小花黃心穎、馮盈盈、張寶儀、蔡思貝同邵佩詩扮偽韓女團，著晒短褲扭晒籮，仲大陣仗到拍埋個重本 MV，但出嚟效果，俾人笑多過俾人讚。
撰文、攝影：娛樂組
|
鍾意就快D Share啦！
|
|
|