選舉主任上星期六取消周庭（中）嘅參選資格，黃之鋒（左）同羅冠聰（右）等一班香港眾志成員，將來參選機會渺茫。
八卦陣
只要 Plan A集會市民：中國人嘅光榮！
星期日夜晚嘅「只要 Plan A」集會，有父母帶住子女出席，反對政府橫蠻無理 DQ，亦都有八、九十歲嘅老人家，出嚟撐眾志一班後生仔。八十歲嘅張伯對今次二度 DQ事件覺得好嬲，批評林鄭月娥政府「上綱上線」。
張伯怒斥：「民主自決有咩問題？我獨立去生活得唔得？咁又係港獨喇喎？」對於眾志一班後生仔，佢讚不絕口，話佢哋係香港人、甚至中國人嘅光榮，因為佢哋爭取嘅事情正確，「你睇吓眾志主席（秘書長）黃之鋒，喺世界都有知名度。」
佢仲引用埋習近平講話要依法治港，「係習主席講㗎喎，點解我哋講一套又做一套呢？點解你呢班手下，習主席嘅嘢你都唔聽？習主席話支持香港特首依法治港，咩叫法治？唔係人治吖嘛！點解你哋個個都唔聽呢？」
最近浸大是非不斷，《壹》仔撞見佢哋學生會候選內閣幹事長黃雅文，佢覺得：「依家咁樣係褫奪香港人投票嘅權利，同埋參選嘅權利，呢樣嘢係唔公義，我哋要出聲。」其實佢參選學生會，好大機會將來被列入「港獨黑名單」，不過佢話唔理得咁多。
「無論係議會或者喺校園，我哋見到最近都係瘋狂被建制派打壓，無論用言論、用媒體、用所有勢力，甚至係本身一啲制度嘅不公。」黃雅文話除咗議會，更加相信喺街頭同社區入面，其實都可以組織到反抗嘅力量。
罷交稅不合作運動以往成效不彰
早前被 DQ嘅新界東立法會議員長毛梁國雄，面對今次政府 DQ風暴，最近呼籲公眾嚴肅考慮搞「不合作運動」，例如罷交十蚊或五十蚊稅。其實香港以往都出現過同類運動，但成效麻麻。
不合作運動概念源於美國哲學家梭羅，喺一九四八年寫咗篇文章叫《公民的不服從》，佢話：「如果今年有一千人不交稅，那不是暴烈、血腥的舉動，但若交稅，那是使政府得以施展暴行，讓無辜的人流血。事實上，這正是和平革命的定義。」
早喺梭羅提出之前，已有唔交稅向政府表達不滿嘅例子。印度聖雄甘地為抵制英國統治，呼籲印度人唔納稅、唔入公立學校、唔到法庭等，又抵制英貨同公開製鹽，最終令殖民政府近乎癱瘓，不得不頒布新憲法，令印度逐漸發展自治體制。一九○九年英國婦女亦唔交稅抗議女性冇投票權，運動持續至一九一八年，部分婦女亦於該年開始有投票權。
喺香港，工黨前立法會議員何秀蘭○七年未當選議員，都呼籲過市民遲交差餉以爭取普選，但惹來批評亦冇乜回響。二○一二年，由反國教絕食教師韓連山等人成立嘅保衞香港自由聯盟，發起過交少十蚊稅行動，抗議用血汗錢出糧俾班庸官，要求謬波、吳得掂同卡片蘇下台，呢次就有部分市民響應，但稅局冇公布有幾多人少交十蚊稅嘅數字，庸官們亦都冇因此下台。
湯家驊違泊喻 DQ AM車又點計先？
每逢大是大非嘅時刻，總會有班牛鬼蛇神現身。行會成員兼資深大律師湯家驊，星期一上電台節目，為政府 DQ周庭解畫。佢以違例泊車做比喻，話所有市民都知道違例泊車犯法，但好多人指政府提供嘅車位不足，因此要違例泊車，當違例泊車引致阻塞交通，警察就會即時抄牌。
今次周庭因眾志主張被 DQ，但選舉主任只係一直問佢國籍問題，九唔搭八，黨友羅冠聰都話，周庭參選就好似喺正常地方泊車，但仍然被罰款咁。
講起違泊，《壹》仔諗起前年有報導指， 689坐住政府車牌「 AM90」嘅豐田七人車，現身旺角花墟，架車仲泊喺只供停車上落客或貨嘅黃色影線區，足足半個鐘咁耐，司機仲涉嫌冇停車熄匙。
參加建測規園界補選嘅司馬文，舊年五月又影到一架車牌「 AM142」嘅政府私家車，喺中環琳寶徑禁區違泊，而架車係前特首董建華嘅坐駕。咁嘅情況，係咪講番句涉事達官貴人好忙，警覺性不足，路面情況敏感度低，叫市民包容一下就當冇事發生先？
抗政府 DQ奸計袁海文獲妻力撐
為咗對抗政府嘅 DQ奸計，民主黨袁海文上星期正式獲黨內中委會通過，成為立法會九龍西補選嘅 Plan B人選。身負重任嘅佢，除咗靠黨友同泛民力量支持，背後仲有一位功臣，就係佢太太力撐。
袁海文話，生命中最啟發到佢嘅人，一定係佢太太，「我太太同我都係有一啲理想主義，想追求一個更加好嘅社會。」另一半並非政界中人，而係一名心理學家，曾經任職世界衞生組織，注重人類嘅精神健康。
佢話根據聯合國《全球快樂報告》，計算一個國家或地區嘅幸福指數時，無論當地 GDP、廉潔度，或者人民有冇自由去作出一啲人生決定等，都會評分。即係人民有冇自由選擇權、係咪活喺民主社會等因素，都影響佢哋係咪快樂。
雖然同太太嘅職業好唔同，但袁海文形容，兩公婆都希望推動世界快樂。佢舊年決定參加泛民初選前，第一個就問太太意見，當時太太問番佢參選目的，佢答係想實踐自己一直以嚟嘅理念，太太即刻支持。佢話太太嘅支持，令佢覺得有一個親密夥伴，「對我從政、對我信念、對我嘅堅持，一定係好大作用。」
撰文:巫不言
|
鍾意就快D Share啦！
|
|
|