位於浸會大學入口的《 Fountain of Life》這座藝術裝置，是由三組展品組成，這七塊幻彩玻璃是其中一組，想表達在幻彩玻璃下走過時，恍如受浸禮、在水底經過的感覺。
壹盤生意
新進建築師，棄名牌自立門戶
三十二歲的黃澤源（ Edmond），是二○一○年香港中文大學建築系碩士畢業生。四年前，他放棄呂元祥建築師事務所的高薪厚職，由平日返灣仔甲級商廈胡忠寫字樓，轉往葵興一個五百多呎的工廈開業，自己做老闆，為的只是實現自己的創作。
「喺大公司，未必有咁大主動權做創新嘅嘢，當時廿八歲，想自立門戶做啲嘢。」
裸辭後，最難是搵客。不過他悟出靠比賽贏獎和眾籌，亦是出路。他同時利用 3D打印生產眼鏡做自家品牌，更自己搞市場推廣，終於得到深圳機場凱悅酒店和浸會大學的委託做裝置藝術，
長洲亦有一個建築成本達五百萬元的村屋重建工程，公司終於漸上軌道。
父親的手藝
黃澤源揀地方開業，首要樓底高、近港鐵和有獨立洗手間，「樓底高可以放大件傢俬及方便影相。」工作室內的布置，是他與父親一手策劃，「當時搞到好大塵。黑色書架係喺樓下執啲棚架搭出嚟，再將佢髹黑遮蓋殘舊痕跡，令到佢睇落似裝置藝術。」 Edmond的父親也從事建築業，做斜坡工程和水電，耳濡目染下 Edmond都想學，「建築師識畫好多圖，但去到地盤點落石屎和搭棚呢？自己落手落腳會更了解工序，行少好多寃枉路。」
他笑說開業資金不需要多，「有枱、有電腦已可以。」反而創業前要有少少積蓄，他儲了二十多萬來迎戰。「究竟你俾自己無收入嘅狀態可以幾耐？如果可以維持一年無收入，那這一年就唔好擔心太多，專心去創業。」
招式一：眾籌
他挾着大公司和名牌學府畢業之名，絕對可以扶搖直上，但他無懼艱辛，放棄四萬多元月薪，這冒險精神和他童年在九龍灣啟樂臨屋區長大有關，「我們有好大地方周圍走，和不同小朋友玩，可以探索周圍環境，執啲垃圾嚟做玩具，或者去花槽挖泥，導致長大後性格上對唔同事物有好強好奇心，慢慢工作上肯勇於嘗試自己範疇以外嘅嘢。」
他第一炮是推出 3D打印眼鏡。「我需要戴眼鏡，我搵不到合適眼鏡，衫褲鞋襪都有尺碼選擇，於是我設計眼鏡。
「因為我讀建築接觸到 3D打印技術，所以我將這技術應用喺眼鏡方面，眼鏡有大中細碼，佩戴者可以選擇鼻托的高低，選擇眼鏡臂的長度等，然後把這項目放喺外國一個眾籌網站 Indiegogo，籌得一萬多美金。」
招式二：自我宣傳
他更自己做市場推廣，「要喺不同社交平台讓人知道你嘅作品，譬如好想上 TechCrunch和 Design Milk，就自己搵編輯 pitch佢，可能搵二十個才有一個睬你，唔可以長篇大論，要幾句講到重點，吸引到佢，佢才會聯絡你。」
招式三：參賽參展
新仔無後台，參賽都是方法。「因為顧客要搵人做裝置藝術時，佢哋會嘗試搵最近喺裝置藝術中得獎嘅人。」
有些獎項，如二○一五年他獲得香港設計中心頒發的香港青年設計才俊獎，令他獲得五十萬元贊助，可以遠赴海外一些著名設計公司實習一年，他選擇在東京著名的藤本壯介建築設計事務所和紐約有名的 ECCO Design各留了半年，去年四月份，他更爭取在國際曝光，在家具設計界屬超級盛事的米蘭國際家具展中推出 FIT-NITURE家具系列，將 Fitness和 Furniture結合，更憑一張可以坐又可以做運動的健身長椅《 X Bench》，獲得 Salone Satellite Award（新銳設計師獎）二獎，「 Airbnb都想將某幾件傢俬放喺北京 office。」遲些他甚至和其他人合資傢俬生意，「佢哋甚至諗一年營業額有幾多，佢哋已經有呢啲 business mind。」
回想初起步時，他也曾想過放棄，「放棄念頭會時不時來 visit你，就算返回原位都唔滿足到自己追求，不如努力睇吓可以點樣將現時工作做得更好。」
開業資料（ 3/2014）
租金：$6,500
租金按金：$6,500
工作室裝修：$50,000
公司註冊：$2,500
總投資：$65,500
營業資料（ 12/2017）
營業額：$88,500
租金：$6,500
人工：$30,000
水電等雜費：$2,000
盈利：$50,000
撰文：李苑欣
攝影：廖健昌
ed_bn@nextdigital.com.hk
|
鍾意就快D Share啦！
|
|
|