朱凱廸上星期自己一個人搭港鐵，證明已經「回復自由」，唔再怕「死亡恐嚇」。
八卦陣
死亡恐嚇成過去朱凱廸隻身搭港鐵
今屆立法會新界西地區直選「票王」朱凱廸，前年參選時爆出「死亡恐嚇」風波。事隔一排，原來佢已經不知不覺間「回復自由」。
《壹》仔上星期三下晝搭港鐵時，遇到佢隻身一人喺列車上撳手機，無咩乘客留意佢，亦無警員貼身保護。朱凱廸原本打算去荔枝角，但撳手機撳到唔記得落車，結果要喺美孚搭回頭車。
講起同日發生嘅錦田村屋被撞閘事件，一直關注鄉村發展嘅朱凱廸同《壹》仔講，嗰條村分成原居民嘅村屋，同非原居民嘅寮屋兩部分，「寮屋嗰部分住嘅人比較複雜」，因為有好多劏房、分租單位等，租客居住時間未必好長，具體仲要了解確實情況，先可以再評論咁話。但說時遲那時快，警方相隔短短一日，就已經拉咗兩個疑兇喇。
競選時講到明要挑戰「官商鄉黑」勾結嘅朱凱廸，因被人跟蹤而擔心自己同家人安全受威脅，要報警求助，結果全家一度要入住警方「安全屋」，仲有警員二十四小時貼身保護。除此以外，佢仲曾經考慮全家搬入立法會大樓辦公室居住，但最終無成事。隨住疑犯先後被捕同被定罪，風波似乎已成過去，威脅已經成為過眼雲煙。
團拜祝酒冇人理葉劉人日食檸檬
鄉議局喺農曆年初七「人日」按傳統舉行一年一度新春團拜，雖然特首林鄭月娥話過，因應早前九巴大埔公路車禍減少出席新春喜慶活動，但今次多個司局長幾乎總動員，連同中聯辦主任王志民，會場冠蓋雲集，顯示鄉事派仍然係政府重要箍票對象。
正當團拜活動進入尾聲，台上嘉賓互相祝酒，祝願新一年事事順利時，身兼行會成員嘅新民黨主席葉劉淑儀，就唔太受到眷顧嘞。雖然葉劉嘅鮮紅色上衫喺台上嘉賓當中甚為搶鏡，但都冇乜人主動搵佢祝酒，佢都無從走入人堆中祝賀一番。佢於是同周圍嘅來賓祝完酒，就攞住杯酒行落台同其他來賓傾偈，又開始講電話，嘉賓切金豬時仲只係企喺遠遠一邊，陣陣酸葡萄氣味接連飄至。
葉劉新年流流就食檸檬，反映佢人緣認真麻麻，《壹》仔諗番起佢三年前農曆大年初二，跟隨一眾鄉紳去車公廟為香港求籤，未入大門就俾麒麟撞到應，之後幾乎行足一整年衰運，撰文講外傭問題搞出種族歧視風波，年中政改表決甩轆淚灑電台等等，睇嚟鄉事活動並唔係當旺葉劉嘅主場。
西貢舞龍採青高佬發低調現身
農曆新年少不了舞龍舞獅場面，年初十當日，西貢都搞咗一場舞金龍同醒獅採青活動，本來冇乜咁出奇，奇就奇在近年已經轉趨低調嘅水房猛人高佬發都有現身，全程仲表現得鬼咁興奮。金龍多番向高佬發拜年：「發哥，祝您萬事勝意！」
屬於西貢麒麟堂嘅金龍，每年新正頭都會喺西貢區內巡遊賀歲，當日金龍喺順之城家庭用品門外舞動時見到高佬發，仲同佢拜年，高佬發梗係笑騎騎。
其實大約八年前開始，號稱有十萬幫眾、實力僅次於第一大幫和勝和嘅水房內訌，喺街頭掀起咗連場血戰，江湖上腥風血雨。幫派分為兩大陣營，其中一方係傳統派，以元老高佬發為首，另一方就係少壯派嘅業仔，大家各推坐館擁兵自重。
一○年初每兩年一屆坐館選舉前夕，少壯派就部署暗殺幫中元老高佬發，但被警方及時阻止。不過，一二年高佬發喺會展遇襲受傷；被喻為水房總管嘅業仔亦曾中伏受傷，三年前仲捲入洗黑錢官司被判監。連串事件之後，雙方都變得低調，高佬發仲好似退隱江湖咁款，今次低調現身，唔知係咪去撐朋友場呢。
哪吒廣告未能上架向廉署舉報
仲有唔夠兩個星期就到立法會補選，新界東嘅激戰由論壇炒到上去廉署。事源「哪吒」方國珊之前同港鐵委託嘅廣告公司簽合約，租咗百和路行人天橋旁一個靚位落廣告，但上架前一日，廣告公司話因為工程原因唔可以擺廣告。哪吒㷫過辣雞，話個廣告位係民建聯租開，懷疑港鐵受到壓力唔俾佢落廣告，仲去埋廉署舉報添。
哪吒發聲明話舊年九月已經簽好合約，原定今年一月十六號到三月十一號落廣告。但廣告公司一月十號先同佢講，因「擴闊行人天橋及相關工程」，而唔可以安排更換廣告。佢接受電話訪問時話，廣告牌位置同工程，一個喺左一個喺右，完全影響唔到，又引述土木工程拓展署電郵回覆佢時都係咁講。
佢認為冇得上架同民建聯有關，「民建聯唔敢否定佢係要呢個廣告（位）嘅，因為年年都係，包括周浩鼎呀、陳克勤呀，全部一定落呢個位嘅。」哪吒又提到，呢件事絕對唔會係散仔可以話事，認為港鐵高層受到民建聯壓力，先唔俾廣告上架，上星期二仲去埋廉署舉報。
《壹》仔曾經向民建聯查詢，但截稿前未有回覆。其餘新界東立法會補選候選人包括黃成智、陳玉娥、鄧家彪、趙佩玉同范國威。
撰文:巫不言
|
鍾意就快D Share啦！
|
|
|