慳住使
探熱針
細細粒儲代用券買護膚品贈阿媽
細細粒陳嘉佳去年事業運極旺，跟住經理人王祖藍返內地搵食外，又孭三部賀歲片，不過豬籠入水的她，依然精打細算唔做大花筒，早前她孖媽咪行街買護膚品，竟然攞出一大疊代用券找數，慳家又孝順。
火速掃貨
肥田有人爭！憑深水炸彈身形入娛圈的細細粒，五年來以女配角身份拍劇集及電影，密食當三番，今年更是賀歲片的搶手貨，串勻《捉妖記 2》、《棟篤特工》及《我的情敵女婿》三套賀歲電影。
密密搵，三十二歲的細細粒早已是圈中低調富婆，除一身名牌，三年前更搬到月租三萬多的灣仔會景閣，與富豪為鄰。早前忙完賀歲片宣傳，趁新年假期帶阿媽出動掃貨。當日孭住 Chanel手袋，一身貴婦打扮的她，到銅鑼灣的 Tom Ford護膚品狂掃，埋到櫃位，充滿購物慾的細細粒媽咪即左指右指，火速鎖定幾款護膚品。點知乜都想買的細細粒媽咪，轉過頭又改變主意，搞到 sales姐姐好忙。
左手均戴住大大隻鑽戒的兩母女，揀咗十幾分鐘，就掃了近十件護膚產品。小富婆細細粒埋單時，唔係用 cash找數，而係攞出一疊代用券， sales姐姐數完再數，不過依然唔夠俾，最後要細細粒簽卡找數。
細細粒出名錫媽咪，父親數年前離開，她跟母親感情愈來愈好，兩年多前，她搬到好風水的灣仔會景閣居住，雖然出入買餸不方便，唔識揸車的媽咪依然十分支持。
儲錢買樓
「其實細細粒好精打細算，雖然會景閣租金貴，但佢計過晒數，包電費同清潔費，維起嚟仲平過租一個三萬蚊嘅單位，加上風水好，佢搬咗入去接咗好多 job。近年佢跟住祖藍入內地發展，兩個都係搞笑，細細粒反應夠快，所以有唔少內地騷都鍾意搵佢，今年算係大豐收。不過佢唔想太辛苦，忙完一輪又會去外地旅行輕鬆吓，如果佢好似祖藍咁搏命做嘢，賺得更加多。」身邊朋友透露。
細細粒希望今年做業主，她曾經表示：「呢兩年買股票成日摸頂，冇咗六位數，啲樓又不斷咁升，真係驚入巿又摸頂，都係努力儲吓首期先」要儲錢，細細粒用代用券買護膚品又確係啱數。
老臨公司出身
八級鋼琴造詣
32歲的細細粒（陳嘉佳），遇上伯樂王祖藍前，是觀塘一間臨時演員公司，負責聯絡工作的職員，偶而亦會落場在電影兼任大茄。直至在電影《矮仔多情》認識初當男一的王祖藍，被對方欣賞，之後安排細細粒在《福祿壽》演唱會為他伴舞，從此獲大台賞識。 13年王祖藍為她在劇集《老表•你好嘢》度身訂造肥妹角色「細細粒」，憑此跑出的她，更成《老表》系列的三朝元老演員。
深水炸彈外形，有霸氣的細細粒，屬家中獨女，自小被栽培琴藝，並取得八級資格，入行前曾在琴行兼任鋼琴教師。
撰文、攝影：娛樂組
|
鍾意就快D Share啦！
|
|
|