最佳編劇獎的頒獎嘉賓，係黃秋生。
一字不刪：
「各位午安，好多謝金像獎俾呢個機會我企喺度，再同大家見面。
香港嘅步速好快嘅，如果有一個人喺某一個範疇裡面，消失咗兩三年，咁就，好多人都唔知佢係乜水。所以容許我趁呢個機會介紹下我自己先下。
我中文名叫黃秋生，意思即係話，雖然黃咗喇，但係喺秋天嘅時候仲有生命跡象咁解（全場大笑），即係好似香港電影咁，好有生命力。
我嘅職業，係一個waiter。waiter係電影藝術入面一個專有名詞，意思即係等待者咁解，唔係侍應。咁我等咩呢？等埋位啦等工作啦等 運到啦。
咁有陣時，我係一個actor，actor又唔係解作行動者咁解，佢係解作演員咁解。
但係其實我嘅真正身份，係一個編劇。我上個禮拜同一個老友傾開，話寫劇本最重要嘅元素係咩呢？第一個係出人意表，另一個元素係情理之中，意料之外。
咁我話，出人意表同意料之外咪同一樣嘢囉？佢話唔係，有少少唔同嘅。出人意表係你估唔到嘅，情理之中，意料之外就係，好合理，但你又估唔到。
例如呢，出年仲有冇香港電影呢？嗱，呢個就出人意表，你估唔到0架下。但情理之中，意料之外呢，就係，喂，我哋年年都有香港電影喎，好合理吖！係咪呀？」
大家應該仲記得，早排有個政協，大大聲喺北京話，再冇香港電影，又指香港地道電影市場狹窄，「只有一種電影，叫『中國電影』」此人今晚出席香港電影金像獎。唔知佢代表緊中國電影，定香港電影？
黃秋生一番言論，鏗鏘有聲。台下有咩反應？
一片靜寂。
來源 source: http://hk.entertainment.appledaily.com
|
鍾意就快D Share啦！
|
|
|