洪朝豐上年確診患上舌癌接受手術後，噚日精神奕奕現身秀茂坪出席「港台電視31流動電視廳」活動。笑容滿臉嘅洪朝豐，左臉同頸位置明顯浮腫，說話較以往慢，但咬字算清晰。被司儀問及身體狀況，佢話：「半年前接受切除舌癌手術，又喺頸切除24粒淋巴核，有四粒被感染，之後需要電療，我行咗一段比較艱難嘅路，但𠵱家未死得。」
變得踏實
洪朝豐受訪時透露手術後患上口乾症，需要不時飲水，而左邊頸會較硬，同埋膊頭會感覺麻痹，但唔影響休息。佢指住左臉同頸位置話表面疤痕已經癒合，但裏面仲未埋口，初時試過影響食道，令佢好易飲水濁親，醫生指情況可以好危險，佢話：「開完刀好長時間我只可以食流質食物，呢一個月可以食到啲固體，但要用粥或者茶去送，但麵包就食唔到，不過我最鍾意嘅馬拉糕就可以用茶送。」
舌頭情況每日唔同，洪朝豐由初期舌頭肥大，以至阻礙上下牙齒咬合，到後來舌頭變「打戙」，可以咬合牙齒同發音準。現時佢仍然要休養，有時會為雜誌寫專欄，佢話：「慢慢過日子，會發現周圍嘅嘢變得好溫柔同踏實，心情有種好暢快嘅感覺。」
撰文：馮仁昭
|
鍾意就快D Share啦！
|
|
|