應屆候選港姐、前組合As One成員陳苑澄日前喺fb貼咗條玩「Kiki challenge」嘅片，落車跟住車行又跳舞，結果俾網民狂鬧，黃國桐律師話呢件事的確係觸犯咗不小心駕駛。
陳苑澄噚日喺銅鑼灣出席活動，全程心事重重，仲多次為咗呢件事道歉，講講吓仲忍唔住喊：「我心情好複雜、好驚，以前冇遇過呢啲事，呢幾日諗咗好耐，唔知應該可以點做。」眼紅紅嘅佢話：「我拍片嗰陣太輕率，冇諗過後果，搞到網民有咁大抨擊，冇諗過事件係咁嚴重。對於呢件事，我自己處理得非常唔好，我罔顧安全，對唔住。」
避談刑責
講到有冇擔心影響決賽？陳苑澄話：「都擔心㗎！公眾嘅評論對我都好重要，希望公司會原諒我。小慧監製有同我傾過呢件事，以後我做所有嘢一定要好小心，諗清楚會有乜嘢後果先會去做。」至於有冇擔心要負上法律責任？佢只係話：「今次係對年輕人做咗個非常壞嘅榜樣，好對唔住！」大會亦都話已經告誡咗陳苑澄。活動後，陳苑澄坐港鐵喺青衣落車，買咗支嘢飲返屋企。
撰文：馮仁昭
|
鍾意就快D Share啦！
|
|
|