「我好專一，一生人到今日為止，得五個女朋友！」82歲的謝賢舉起3隻手指發誓。
16歲入行的謝賢，因高大靚仔專拍愛情片，被封為風流小生！現實中的四哥拍過5次拖，有兩段婚姻，首任妻子是台灣第一代玉女甄珍，第二任妻子是前美艷女星狄波拉，現年82歲的四哥老而彌堅，早前才跟細49年的舊愛CoCo分手。一生離不開愛情的四哥不認風流：「我好專一，一生人到今日為止，得五個女朋友，真係㗎，我唔係亂咁去乜，我唔係太好色，我好尊重女性。」
年紀大了，有些記憶變得模糊，尤其是逝去的戀情，對瀟灑的四哥來說，可能是舊夢不須記！叫四哥細數情史，他帶點猶疑反問：「第一個係咪甄珍呀？」記者笑着提他首位女友是嘉玲姐，問兩人點解會分手？四哥的回憶返來了：「我衰囉，嗰陣我哋一間公司，因為相處得耐有感情，個個認為我哋拍拖，我亦都接受，但我衰鍾意玩，有時出去打枱波、打牌，丟低佢，我同嘉玲11、12年，後來佢撞到一個泰國仔，忽然同我講佢要結婚，我話你咪嫁囉，要結婚先話我知，唔要得落啦，佢哋結婚我都有去。」
甄珍是他的第一任妻子，兩人於74年結婚，76年離婚後甚少碰面：「上次佢嚟香港拍自傳，佢搵我，我係佢第一個情人同老公，佢搵我拍咗兩張相，好耐冇見佢啦，離婚後冇來往。」再見有甚麼感覺？四哥坦言：「我真係冇咗印象，良心講冇見佢20年，有次佢嚟香港，我撞到都唔認得佢㖭，因為變咗樣。」有指當年甄珍傷最深？四哥問：「我唔記得咗啦，傷我乜嘢？」當年甄珍愛上劉家昌，跟四哥結束2年婚姻，他說：「劉家昌夠韌力嘛，人係有感情動物，變心唔怪得佢，呢個講人性。」
好難想像這兩段戀情，四哥都是被飛的哪個，他沒怪舊愛變心，反自責：「佢哋搵到比我適合嘅人，你知啦，嗰陣我又後生又花弗又鍾意玩，一星期打三四次麻雀，呢啲都係我唔好，唔關佢事，兩夫妻唔可能日日攬住喺屋企，都要有啲交際，好似甄珍咁，我叫啲朋友嚟打牌，佢又戇居居喺房，整整下佢無聊，當佢識到一個木木獨獨又幾靚仔咪變心，佢又唔係好熟香港，廣東話都唔係好識，呢啲係天註定。」
數到第三個女友，四哥又忘了是誰，要人提才記起是蕭芳芳，四哥同樣自責：「都係我衰，拍拖之後，覺得呢個女仔好好、好乖，鍾意讀書，佢叫我得閒讀多啲書，我：『玩都唔夠時間，你叫我去讀書！』咁之後，佢話：『既然你咁，都唔係我需要嘅人，我哋就拜拜！』自己都覺得呢個女仔咁乖，而且佢同媽媽相依為命，咁我退出啦，十幾年後，佢有打電話同我傾偈。」
第四位女友是拉姑，亦是第二任妻子：「又係我自己衰囉，衰謝賢！成日掛住玩，拉姑好識做家務同照顧男人，我乜都唔使做，佢照顧晒，有時我打牌打到天光，又係衰我囉，總之呢個係上天安排。」
最愛是誰呢？四哥說：「五個都愛，分開咗依然係朋友，我最安心，佢哋啲男朋友同我都係好朋友。」現在沒女友會否好悶？四哥說：「冇咪冇囉，依家已經唔同咗，人成熟咗對呢樣冇咁重要，上咗年紀好似我依家咁嘅生活，對女人冇乜好大嘅心，朋友最緊要。一個人住咗幾十年，依家你叫我娶老婆，我死畀你睇，可能咋！」
撰文：余燕儀
攝影：仇志德
攝錄：廖達燊
場地：Table 18@apm
| 謝賢發誓一生只有五個女友 | | |
| | |
|
鍾意就快D Share啦！
|
|
|