蕭潤邦（Oscar）當年退出樂壇到上海學整生煎包，在飲食業闖出一條血路，今年4月還斥資逾百萬開了一間「生煎皇后」為名的麵店送給年底完婚的未婚妻江若琳，希望她也學做生意。該店開業僅半年，卻要面臨「摺埋」，Oscar表示都非常可惜，但這是商業決策，因為旗下的店舖會進行品牌重組。
「生煎包王子」蕭潤邦將於12月23日迎娶江若琳，婚後當然夫唱婦隨，雖然Oscar一直好支持未婚妻在演藝事業上的發展，但他的食肆生意都做得有聲有色，當然都想江若琳做賢內助。今年3月，Oscar就斥資逾百萬在深水埗開麵館送給未婚妻江若琳打骰。不過，本報近日收到消息指麵館即將摺埋，最近低調賣盤，有不少買家有興趣相約睇場洽商，Oscar昨日回應時承認確有此事。
Oscar當日籌備新店贈江若琳，他更大讚未來老婆有生意頭腦，希望江若琳可以嘗試學做生意，Oscar曾說：「新店以佢嘅想法為主，佢從冇做過飲食生意，雖然佢係門外漢，但好有煮嘢食天份。」江若琳則表示第一次涉足飲食業，心情緊張又興奮。今年4月底，新店終於開幕，當天更安排了舞獅助興，Oscar跟江若琳恩愛上陣，他們並異口同聲計劃半年內再開多一間麵館。
| | |
商業決定
開業初期，江若琳天天巡舖，皆因她相信力不到不為財，凡事親力親為，食客亦排長龍幫襯，生意不錯。江若琳亦不時鑽研新菜式，給食客新口味和多款選擇，沒想到開業不夠一年，麵店即將摺埋。《蘋果》昨日就有關消息求證Oscar，他在電話中直認不諱：「真係好可惜，但呢個係一個生意決策，我哋嚟緊想『正宗上海生煎皇』統一番個名，咁會集中啲，所以係商業決定。」
問到決定將麵館摺埋，事前可有跟江若琳商量？Oscar回應：「有呀，佢百分百支持，其實麵館呢個場，我哋試咗好多新菜式，所以嚟緊呢啲新菜式都會放番入其他店。」
生意理想
麵館至今開了約六個月，Oscar直言生意額理想：「生意額理想㗎，好多朋友嚟支持，我諗過統一咗品牌後，對公司將來發展會更好。」Oscar和江若琳從長計議後，就忍痛作出這個決定，至於麵館預計做到何時？Oscar坦言：「未預計會做到幾時，有啲嘢要啲時間安排，總之多謝一班擁躉支持。」
麵館生存時間雖短，但給Oscar和江若琳留下不少溫馨回憶，今年5月母親節，江若琳就帶了未來奶奶、Oscar媽咪到店中慶祝，兩人更夾手夾腳炮製了加足料的花膠麵給蕭媽媽吃，𠱁到蕭媽媽未吃都笑到見牙唔見眼，對準新抱讚不絕口。
採訪：陳杰
|
鍾意就快D Share啦！
|
|
|