謝賢，被尊稱為四哥，因家中有八兄弟姐妺，他排行第四，16歲入行拍戲，縱橫影視圈66年，現年82歲的四哥老而彌堅，人生過得很精彩，瀟灑笑看風雲！
平日出入中環的四哥，這天到觀塘接受《蘋果》專訪，落車後單手插袋、腰骨挺直步入商場，82歲高齡依然有型有款，星味十足！樂天知命的四哥，侃侃而談他的人生，原來，四哥的家族都很長命，而且家學淵源，阿爺是詩人，姑姐是校董，偏偏四哥和霆鋒卻讀書不多，四哥提起阿爺很自豪：「阿嫲有102歲，阿爺就70幾歲走咗，我阿爺係詩人吖，你知唔知，佢同一班學者做咗一個詩社，佢有教過我寫詩，但我唔記得晒啦，哈哈！」
雖然有個詩人阿爺，但四哥卻無心向學：「我姑媽係麗澤中學校董，我喺嗰度讀書，但畀人趕出校，百厭到不得了，嗰時德興街有好多遊手好閒年青人，我join埋佢哋，整整下又唔讀書，總之我唔係讀書嘅人。」四哥有八兄弟姐妹，大家姐現已90多歲，四哥說：「我哋感情好和洽，嗰陣屋企真係好窮，爸爸失業好耐，我入咗電影行之後，爸爸媽媽都係我養，我仲負責供四個弟妹讀書，照顧佢哋生活，所以佢哋個個當我係爸爸咁，好感激我好尊重我。」
八兄弟姐妹中，四哥最靚仔，所以入行做明星？他大笑：「呢句就真喎，哈哈，家姐細妹都好靚，但男仔就麻麻地，冇我咁靚，可能個天公造美，因為我要入電影行，所以靚仔啲，哈哈哈！最深刻就係未入呢行前，嗰陣唔知做乜，書又讀得少，覺得讀書冇乜用，出嚟做嘢仲好啦，所以去咗考領光演員訓練班，取錄咗我一直做到有名，嗰陣可能我幾靚仔啦，哈哈哈，靚過依家好多。」
男人最怕甩頭髮，但82歲的四哥沒這煩惱：「呢個真係多謝老天，同我一齊長大嘅人，有啲甩晒，有啲甩一半，有啲白咗，但我真係算好彩，有樣嘢可以畀所有人參考，屋企有個倒吊機，成日得閒就做，倒吊啲血衝落個頭，初初頂唔做，每次做兩三分鐘。」有冇介紹霆鋒玩？四哥說：「佢唔信，佢後生唔需要嘛。以我咁嘅年紀，你睇，又黑。」問到四哥keep fit之道？他說：「因為我好多衣服要着嘛，如果我有肚腩咪要換，為咗啲衣服咋。成日去行吓山，起身做吓push up，朝早肚餓咪食碗麵，或者食多士，之後就出街食，有時夜晚返到屋企11點，叫工人煮啲嘢食，總之唔好食得過份，我依家130幾磅，人最重緊要膝頭哥，保持行山，永遠等膝頭哥有力，就算喺屋企都踎吓。」
活到這個歲數，害怕死亡嗎？四哥瀟灑地說：「我真係唔驚死，我都冇死呢個字，死咪死囉！」希望長命百歲嗎？他說：「千祈唔好，長命百歲收尾嗰幾年難頂，瞓喺度等人嚟探我，『吓！邊個呀？哦！』咁咪仆街，哈哈哈！依家五官端正，仲好正常，健康冇得頂㖭，個個好羨慕我，八張幾仲跳跳紥，三高都冇，冇話呢度痛嗰度痛，風濕都冇。我依家要求都冇，成日覺得自己係好幸福快樂嘅人，真係好滿足，所以冇話貪呢樣貪嗰樣，我個人冇乜所謂。」
四哥的人生就像一本豐富的書，其中有兩個疑難，現由四哥親自解開！
1）金句「兜巴星你埋牆」的出處？
四哥：「呢句說話係我創出嚟，拍戲講咗之後，一直咁講，但我呢世人真係未打過交，嗰次（摑曾江）表演咗畀你哋睇啦，一半係遊戲性質，我唔係大力，係咁易，佢可以打番我，佢冇打蝕底，呢排佢好少出嚟，好似話行動唔方便，點解咁渣，我到依家仲好似咕喱！佢嗰次激得我好嬲，但我唔記得佢激我乜嘢，所以依家見到佢會攬頭攬頸，又唔係十冤九仇，佢喺美國讀書返嚟，恃住讀過幾年番書，返嚟見香港友仔鄉下佬，我最唔抵得佢呢樣嘢，佢個妹係林翠，而林翠老公係我恩師，其實我同佢哋好好關係。」
2）點解日夜都戴黑超？跟張文慈拍亞視劇《情陷夜中環》床戲都不肯除？
四哥：「睇唔到我對眼咩，真係吖，我夠近視囉，我有乜嘢，我除過畀人嚟（床戲）費事睇清楚佢，唔着衫咁近，搵副眼鏡隔住。」
霸氣如四哥，答完即下令：「好嘞，收工。」
撰文：余燕儀
攝影：仇志德
攝錄：廖達燊
場地：Table 18@apm
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|