改編自漫畫嘅電影《頭文字D》，集結當時人氣型男周杰倫、余文樂、陳冠希等人，加上男人都抗拒唔到嘅跑車，2005年上映時立即大受歡迎。
時隔13年，《頭D》編劇莊文強日前出席東京電影節，受訪期間被問到拍續集嘅可能性，莊文強承認「以前確實有過打算，但導演劉偉強堅持用真車拍攝，成本太高，所以拍續集並唔容易，希望佢搵到老闆」。
對於莊文強講法，唔少網民都唔認同，話成本嚟講，啲車根本唔係咩大數目，班演員嘅片酬先係最乸利。另外，亦有人擔心就算搵到老闆揼本拍續集都唔係件好事，如果沿用前作演員，周杰倫、余文樂等人都已經三十幾就嚟四十，拍唔返以前嘅o靚仔feel；如果用新演員，基於資金同市場都以大陸為主，最後選角都可能係陳偉霆、吳亦凡、景甜等人，咁真係唔拍好過拍。
最最最重要嘅係，觀眾一向覺得飾演阿木嘅杜汶澤先係《頭D》嘅真 主角，全靠佢部戲先至增添唔少趣味，話係核心都不為過。但，基於阿澤被內地封殺，十成無佢份，套戲亦會頓失靈魂。唔通真係要搵王祖藍代替演阿木咩？所以續集都係咪喇，放過經典啦。
來源 source: http://nextplus.nextmedia.com
|
鍾意就快D Share啦！
|
|
|