由人夫變成「淫夫」的許志安被爆背妻「偷食」，與無綫小生馬國明女友黃心穎在車廂中「摸啜」超過廿次！犯下彌天大錯的安仔昨晚痛哭流涕承認色心起，自責「醜惡」、「好惡心」，雖然連番道歉，但一句「不被原諒嘅事」，似乎五年婚姻凍過水。
今年是安仔與太太鄭秀文（Sammi）結婚五周年，但他竟然背妻與「姣精」黃心穎「偷食」，全城震驚！偷情短片長約16分鐘，安仔與戴上口罩的心穎及男友人一齊坐上車廂後座，當她聽到男友人堅持先送她回家即爆粗：「唔好扮嘢X你！兜X咗我先？」兩人擺明想急急撇甩友人！期間，心穎無視男友人在旁，親蜜地搣安仔的耳仔，又繼續肆無忌憚翹實他的手臂，再來一招胸壓，兩人還鬼祟用手袋遮住玩十指緊扣，當男友人落車，兩人即合拍叫司機：「鯉魚門（心穎香閨）！」然後心穎即餓狼上身，全程採取主動，隔住口罩飛撲先咀安仔一啖，可能嫌未夠喉，除低口罩再攬實激咀。
車廂激咀逾廿次
摸埋大髀 10分鐘車程，兩人狂咀超過廿次，最長一次啜足成分鐘，更加啜啜聲！安仔又將手放在女方大髀，姣精上身的心穎更加狼死，邊啜邊用手不停在安仔大髀游戈，又姣爆不停以英文對安仔講「你好驚呀？」、「你可以同我哋玩嘛」等，雖然似有醉意，但她臨落車卻清醒地說：「去到燈位轉右，唔該！」
事件曝光後，安仔傍晚火速召開記者會親作交代，一臉憔悴的他先向在場逾百傳媒鞠躬，甫開腔已忍不住哭起來：「真係好想親口衷心同大家講一聲對唔住，我要為我嘅家人、Sammi嘅家人、朋友，同埋錫我嘅人致萬二分歉意，因為自己做咗一件不可彌補、不被原諒嘅事，呢個錯我深深咁去反思自己，我係一個醜惡嘅人。」
安仔繼續邊哭邊說，表明要承擔責任，宣布暫時停工：「我嗰晚的確飲咗好多好多好多嘅酒，但我覺得飲醉酒絕對唔係一個藉口去犯呢啲咁錯嘅事，我非常之後悔，同埋好難面對自己、接受唔到自己。我覺得自己好丟臉、好錯、好討厭、好惡心、好陌生，我有深刻反思點解唔可以控制自己去犯呢個錯誤，起咗呢個色心。由依家開始我會暫停所有自己嘅工作，直至搵番一個真正嘅自己同埋正確嘅自己，重新去檢視自己去學做人。」
宣布停工：畀時間搵番自己
對於老婆Sammi，安仔一而再向她說對不起：「我覺得自己不知所謂，因為我嘅錯誤同埋行為，令到身邊所有愛錫我嘅人，承受一種咁大壓力同痛苦，我希望嚟緊日子裏面，將所有被我整傷過、整痛嘅人都可以好好，我深刻反思其實我最錯嘅地方係迷失咗我自己！最後我要再一次同所有愛我嘅人講一聲，令你難堪、我做錯，對唔住，同埋對唔住Sammi，我唔知以後點樣去走自己嘅路，我呢一刻係冇咗靈魂， 我係一個壞咗嘅人，希望大家可以畀時間我搵番自己，最後再一次同所有朋友講聲對唔住。」隨即起身鞠躬10秒道歉。
離開記者會後，安仔登上保母車，但依然激動痛哭，座駕直駛回淺水灣寓所。他在會上未有交代與Sammi的婚姻狀況，問到Sammi可有原諒、演唱會是否取消等問題，他都未有回答，事後在社交網再道歉：「這是一件不可能被原諒的錯事，我不敢奢求原諒……最後作為一個丈夫，我要向Sammi說對不起…我感到慚愧及痛心…」兩人的婚姻明顯告急危危乎。據知， Sammi得知老公出軌後情緒大受打擊，將Fb封面圖片變成黑色，似乎心已死，友人都擔心她抑鬱症復發。
Paco幫口望Sammi原諒
許志安經理人黃柏高Paco發聲明指安仔就其酒醉及不當行為道歉，深明犯下嚴重過錯。作為公眾人物要為自己行為負責，即時暫停其所有工作。問到其太太Sammi是否已原諒安仔？他說：「佢一定有同太太交代，係咪可以表態原諒佢，未知！努力了解中，呢一刻答唔到你。（擔心佢離婚？）以社會角度嚟睇……片中女方採取主動……當然唔可以賴晒人，始終都係安仔一時糊塗，希望Sammi畀次機會佢，亦希望大家唔好判佢死刑，過往佢都做咗唔少公益事，都唔想佢一鋪清袋。」
發布偷拍片或違私隱條例
黃心穎與許志安疑在的士車廂被偷拍，個人資料私隱專員公署回覆查詢時指，司機收集影像資料時須確保收集目的有實際需要，如保安理由等。若將資料用於目的以外的用途，包括在網上披露，便有機會違反《私隱條例》。
至於執業大律師陸偉雄亦表示，司機一旦公開該短片，不論是循網上途徑或交由媒體發布，都已經超出保安原意，可能違反個人私隱條例，甚至觸犯刑事罪行。他又指片中當事人可向法庭申請禁制令，禁止任何人再發布或轉發有關片段，並將媒體平台上的影片下架。若影片影響事主的知名度而造成金錢損失，可循民事途徑向偷拍者索償。另外，運輸署昨日擬訂的士安裝閉路電視指引，不可用作錄下乘客對話。
網友嗌分手九巴抽水車廂嚴禁偷食
黃心穎與許志安背另一半「偷食」後，引起全城熱議！不少網民留言力撐「受害者」馬國明與鄭秀文，更叮囑馬國明要忍痛斬情絲：「唐詩詠、胡定欣仲係單身！」有人指一直不睇好「明心」戀，力撐他分手。不少網民直言對安仔「非常失望」。
至於安仔舉行記者會前有網民開盤估計他會怎樣解畫，包括「爆喊對唔住大家，希望大家可以原諒1賠1.5」、「全程女方做主動只係做配合，女方落車後各散東西1賠5」及「當事人唔係我1賠100」等。記者會後，大批網民依然在其社交網上留負評，四小時內有逾四千個鬧爆他的留言。
另外，網上瘋傳不少惡搞圖片，更以「安心」為題，包括有「安心」汽車鏡頭、「安心」打的及馬國明在劇集《降魔的》駕駛的紅的變「綠」的等。九巴Fb專頁亦同樣「抽水」，貼出大家乘搭鯉魚門（心穎香閨）路線時，要留意「車廂內嚴禁偷食」。
飯敍現場合照 丁子高：同佢哋唔熟！
曾與安仔及黃心穎飯局的丁子高，昨日出席護膚品牌活動，回應時不欲多談：「嗰日朋友生日！我成日周圍飛，有時都參與唔到 佢哋嘅飯局。（邊個帶心穎加入你哋？）唔清楚，同佢唔熟。人哋 嘅事冇乜可以回應，交番畀當事人」
同場的藝人袁詠儀（靚靚）透露特別為性感打扮而小食多餐Keep Fit，又笑指丈夫張智 霖身形似多啦A夢，飲食方面自制能力不足，記者即笑說：「佢其他方面自制夠咪得囉！」靚靚即「醒水」明白暗指許志安 與黃心穎偷食事件，她說：「人哋嘅事唔講喇，係朋友就收聲。（擔心老公有飛來蜢？）我老公有講，話呢個世界冇話冇 咗邊個唔得，唔係𥄫實就會冇事！我會充實自己，盡量自強。」直認與安仔老婆鄭秀文熟落，亦擔心對方的情緒。
與黃心穎傳緋聞的藝人李思捷，昨晚出席活動時坦 言沒有睇片段：「知道後都覺得好心噏，因為佢哋兩個都係我朋友，發生呢啲事一定對佢哋造成好大傷害，始終付出咗咁多努力建立事業。（問候佢哋？）唔會！佢哋依家最需要冷靜，我亦唔會睇條片，怕自己Share出去嘅話好X街。」
更多新聞，請瀏覽東方日報網頁：
https://orientaldaily.on.cc/
|
鍾意就快D Share啦！
|
|
|