杜汶澤與陳百祥應港台邀請在facebook live論戰，最高峯的收看人數直達27萬，兩人激辯花火四濺。阿叻在辯論中講到支持成立獨立調查委員會：「件事都未平息，你查咩，如果而家有獨立調查委員會就係審警，你都冇fact。委員會係要查晒成件事，點解要打學生？喔，原來你係暴徒。」阿澤以藍絲口脗回應：「查埋美國有冇出錢啦。」阿叻認同：「呢啲唔使查啦，唔係邊有資源呀？」阿叻同時堅持：「你都係想查警察啫。」
講到查警察，話題引伸至委任證的問題，阿叻問：「點解要畀你睇委任證呀？」阿澤質疑如何分辨警員，阿叻反駁：「之後再查囉，全部有片呀，而家啲科技蒙咗面都搵到人，邊度出勤、有晒編號，你冇聽保安司講咩？」阿澤愕然反問：「咁委任證幾時用？」阿叻又講偉論：「委任證係天下太平時，啲警察出嚟維持秩序，你想知邊個係警察先畀你睇。警察執行緊咁危險工作，點畀你睇委任證呀？唔係咁荒謬呀？槍都冇時間拎，拎委任證？」阿澤指制服上有位展示，不過阿叻指：「如果呢樣你覺得有問題，你咪去獨立調查囉。」
阿叻又舉例：「你啲記者懷疑佢，佢要拘捕你，喺冇暴力下咪畀你睇『我係警察嚟架』，你唔信佢，就問佢拎畀你睇囉。」杜汶澤反問：「而家咪係咁囉。」阿叻就即轉口風：「我都唔知你係咪記者，（記者證）係人都發到出嚟咁滯。」阿澤聞言即目瞪口呆。
阿澤覺得委任證用以識別身分：「叻哥頭先講獨立調查，話可以用編制去搵，但委任證本身係用嚟識別一個警員。而家冇人帶出嚟咁滯，又蒙咗面，先唔講肢體暴力，有啲仲挑釁市民…」話未講完，阿叻斥：「市民挑釁警察咋話，警察無端端挑釁你？有冇呀？唔好夾硬調轉嚟講啦。」阿澤反諷：「叻哥應該都淨係睇新聞，睇TVB啦。」阿澤認為：「如果警員唔再show委任證出嚟，呢種互相挑釁係冇可能停止到。」
|
鍾意就快D Share啦！
|
|
|