社會運動持續了4個月，社會撕裂，黃藍敵對，藝人當中也有持不同政見，深黃杜汶澤不時在facebook表態，不滿特首林鄭月娥未肯順從民意配合五大訴求，他又鬧爆警察濫暴和濫捕，而藍絲最突出的代表有到疑似到警署送奶茶和燒鵝等慰勞警隊的「荷蘭叻」陳百祥，他語出驚人表示若做警務處長，兩個月前已開真槍。
港台節目《視點31》明天4時半直播深黃的阿澤會深藍阿叻，兩人一齊談局勢論民情，據知直播會長達1小時，節目預告在香港電台視點31的fb網頁貼出，相信二人到時唇槍舌劍，火藥味極濃，網民熱切留言：「超期待」、「阿澤，麻煩你幫我哋出口氣」、「阿澤畀啲風度，唔好殺到佢一棟都冇，留少少等佢出下醜，至有得笑」、「我諗你哋叫定FA先」、「申請咗不反對通知書未？連埋主持3個人，同埋要救護在場預備喎，聽日場面都幾恐怖」，網民一定要買定花生等睇好戲。
有網民都預計阿澤會不停爆粗，阿澤今日卻在fb留言預告：「首先，當收到自己偶像利君雅嘅來電，我承認我係有啲緊張。之後佢同我講話討論嘅對象係幻想自己如果係警務署長就一早開真槍嘅陳百祥，問我有無問題，我就話自己脾氣唔係幾好，怕影響到香港電台一貫健康、持平同中立嘅影像。不過，雖然聽日唔係利君雅做主持，但係佢打得畀我，我一定支持佢。所以我應承咗，做呢個節目。更加要多謝陳生應約。至於我睇到港台好多留言，希望我會爆粗甚至動武，我應承咗利小姐，會以禮相待，大家可以死咗條心。Oh by the way，如果聽日警察想再開記招，我睇不必嘞，因為，根本唔會有人睇。」
阿澤今日回覆《蘋果》時說「其實係我偶像利君雅打畀我，我開頭都婉拒佢，我自己脾氣唔好，血壓又高，後來講吓講吓，費事托手踭，佢係我偶像，聽日係一個討論，港台出問題。」問阿澤點解阿叻肯出席討論，阿澤說：「我相信係因為佢個人好。」
有網民就阿澤與阿叻會面對決開出賠率，阿澤勝出賠率是1.27倍，而阿叻勝出就2.6倍，明顯阿澤大熱，被看好拗贏阿叻，另有「拍枱走人」賠率，會拍枱走人賠2.88倍，不會拍枱走人賠1.27倍，即估計二人不會拍枱走人居多，至於「爆粗」賠率為1.27倍，不會爆粗為4倍，而「流眼淚」賠率為4倍，不會流眼淚為1.27倍，亦即普遍認為二人會爆粗及不會講到流淚。
-----------------------------
【直播】 #阿叻 、杜汶澤出席港台視點31節目對談論時局
杜汶澤同阿叻嘅辯論比賽，即將喺16:30開始，相信大家都非常期待。開波之前，不如睇睇阿叻嘅神演技，真係津津津樂道㗎！
|
鍾意就快D Share啦！
|
|
|