反送中運動從6月至今已經持續了半年，縱使政府對民間訴求充耳不聞、警方不斷用暴力打壓，但市民依然未有退縮，抗爭遍地開花。看見一幕又一幕警方粗暴鎮壓，有抗爭者感無力而以死控訴，甚至因為政見不同，令家人和朋友之間的關係決裂，實在令不少人的情緒受到困擾。小占日前在尖沙嘴接受《蘋果》訪問，他說自從做回精神科護士後，每天的工作忙過不停，但仍爭取時間努力覆message ，他說：「我唔係啲乜嘢好勁嘅人，但我係一個護士、係一個幕前人，又係一個土生土長嘅香港人，希望用我嘅知識、少少嘅影響力，帶畀人歡樂。」
小占還説：「其實我都同好多人傾過呢個問題，大部份人都係有無力感，覺得自己幫唔到手、冇用，其實喺一件事入面，有好多唔同嘅崗位，就算去打仗都好，唔一定個個都企前線，都要有人喺後面煮飯同種菜，咁啲士兵先會有飯食。當你係學生，係一個小學生，一定好危險，就算你話幾克制，但係突然間有1、2個混入去搞事，令到成件事變得暴力咗，呢啲係冇得預計，係咪話咁樣就幫唔到件事先？」小占提出多種方法推動運動：「但係原來有其他方法，好似屋企總係會有人政見唔同，可以同佢講吓，唔一定係說服，只係畀佢哋睇吓而家發生緊乜嘢事。唔係話藍絲一定衰，喺佢哋嘅年紀，睇嘅嘢就係咁多，成世人都係睇嗰個台，成世人都唔上網，所以睇到嘅資訊係咁多，正如好似同啲窮困地區嘅人講，三文魚有幾好食，佢哋都唔知係乜嘢嚟，好難逼佢哋講話好好食，咁我哋又可以做到啲乜嘢呢？當畀其他嘢佢哋睇，畀多啲資訊，唔一定係強迫。」
小占坦承因為工作關係，沒有辦法走去前線，當然亦有與家人持相反意見，試過有好大嘅無力感：「大家睇法唔同，第一下聽到佢哋講梗係忟，好似痾咗尿喺個廁板，都可以嗌好耐，何妨而家咁大件事？你要諗深一層，唔同人有唔同諗法，人哋嘅諗法係咁，覺得呢班人全部都唔好，我哋何嘗又唔係覺得佢哋有問題？咁嗌法係沒了沒完，應該係諗吓有乜方法令到件事更好，係對事唔對人，分析咗件事，有啲嘢係錯喎，所以就算真係好嬲，我都唔會post一啲打到好傷嘅相，反而係post啲專業人士嘅說法，如果你睇完都覺得冇道理嘅話，我都唔知點樣講，事實上我本身都有1、2個親戚，睇完之後都覺得佢哋啱。」
小占更有感而發地說：「我本身係一個成日受負評嘅人，啱啱入行嗰陣都聽咗唔少，有啲真係好無理，但係我係一個精神科護士，識得點樣去調節，要諗方法點樣去改變，鬧住嚟睇，起碼都叫有注意，之後我學識會答番佢哋啲問題，就算好無理，我都會用番啲搞笑或者自嘲方式去答，如果鬧完我可以開心，又冇所謂。呢個方法同樣擺喺而家嘅社會上，政治嘅嘢，對市民嚟講真係解決唔到，除咗投票之外，又可以做到啲乜嘢？咪惟有鬧，原來鬧完之後真係好爽，雖然件事係冇解決到，不過當刻笑吓又無妨，其他嘢留番第二日瞓醒先再算，始終今日唔知聽日事，我都有post話好多時呢啲嘢成日都會知道，有啲嘢唔係必然，可以突然間可以冇咗，大家要珍惜而家擁有嘅嘢。」
撰文：唐琛悠
攝影：陳慧安
場地提供：The AIR (The ONE)
|
鍾意就快D Share啦！
|
|
|