2019年12月16日星期一

【頭條獨家】帶阿譚睇起龍舟食和味龍鼎爺爆孫仔有望傳承廚藝 __,李家鼎,鼎爺,

【頭條獨家】帶阿譚睇起龍舟食和味龍鼎爺爆孫仔有望傳承廚藝

鼎爺和阿譚愈拍愈有默契，都希望節目長拍長有。

李家鼎和譚玉瑛合作主持的《阿爺廚房》最近推出第四輯，兩人都話愈拍愈有默契，鼎爺當正阿譚好似孫女一樣，兩人今次去到順德和鼎爺家鄉南海搵食，難得睇到起龍舟，同一嘗和味龍隆（龍蝨）。不過，兩人雖然經常有機會食好嘢，但明白做食肆不易，尤其做了老闆的鼎爺有更深體會，他更自爆孫仔有望傳承他的好廚藝。撰文：杜淑霞攝影：李權威

鼎爺話以前龍舟多用坤木（坤甸木）做，但唔可以長期曝曬，會放在河底埋在泥漿底保養，端午節前要動用多人起出來。

今次到順德和南海拍外景，鼎爺大呻拍得特別辛苦，「我哋5、6月去拍，日日都好好天，但有成3、40度，熱過香港，真係差啲熱到暈低，死頂住咋！」阿譚亦大讚鼎爺專業，「佢明明好唔舒服，但係一埋到位對住個鏡頭就好似冇事咁，真係好厲害。」

愈食愈嘴刁

談到精彩內容，兩人最開心睇到起龍舟，鼎爺說：「我哋細個睇過，嗰時香港都有㗎！𠵱家好少地方有得睇囉！」阿譚亦謂：「雖然嗰日我哋企咗喺橋度三粒鐘，但係都唔覺得辛苦。」講到食方面，阿譚話最難忘食了水曱甴，「我真係第一次食咋！最初都驚驚哋，但食落都冇乜嘢。」

鼎爺又爆阿譚愈食愈嘴刁，但兩人都唔會踩人哋煮嘢食，特別是開了食肆做老闆的鼎爺，「做咗老闆更加費事評價人哋同埋都明白做生意真係好艱難，好彩自己啲生意暫時冇乜問題。」談到兩個囝囝都開食肆，能否承繼他衣缽學到一手好廚藝呢？鼎爺說：「大仔都有學廚，但煮西餐叻啲，細仔煮冇天份只識食，反而孫仔最近竟然鍾意玩煮飯仔，仲會跟住啲步驟，但係佢𠵱家仲細（3歲），希望佢將來真係鍾意學」