2020年1月23日星期四

【頭條獨家】望成功增肥到100磅姚子羚鼠年唔心急求姻緣 __,姚子羚,

【頭條獨家】望成功增肥到100磅姚子羚鼠年唔心急求姻緣

子羚笑言新年期間睇《黃金有罪》最啱食「黃金滿屋」

近排忙於為新劇《黃金有罪》宣傳的姚子羚，新年總算有幾日假放，決定跟「雲來軒」行政總廚黃亞保學整賀年素菜「黃金滿屋」，到時跟家人朋友齊齊慶祝。講到新年願望，豬年劇接劇加上早前患過甲型流感，令子羚瘦到得番94磅，所以鼠年除了希望演到更多好角色，最想能夠增肥到100磅以上；講到姻緣她反而唔心急，只想搵到個孝順顧家，心地善良的有情人。撰文：杜淑霞攝影：李權威髮型：Taylor Wan@Hair Corner 化妝：Henry Li 服裝：MURUA@i.t、Dearbell2ling 場地：雲來軒

由於大廚保哥知道子羚為了不殺已食素3年，專登將「炒貴花翅」改為素食版用素翅代替。

子羚好滿意豬年發展，工作排到密麻麻，不過正因太忙疏忽了身體，「19年所有重要節目都喺工作中度假，不過做呢行係值得感恩，但係因為之前兩套劇都係好需要體力，《唐人街》要打，《大步走》就跑，加上之前中咗甲型流感，瘦咗好多，嚟緊要調理番好身體，先可以努力搵錢。」

對象要孝順顧家

講到鼠年願望，子羚先為大家祝福，「希望所有人平安快樂，大家多啲正能量，世界減少多啲天災人禍。至於個人，就想新一年事業更上一層樓，同埋增肥成功，講完係會畀人打嘅，哈哈！有人話我食素後易瘦啲，但係我家姐食全齋，佢都幾豐滿，所以應該唔關事，我希望由𠵱家94磅增到102磅。」至於姻緣，子羚一切隨緣，「我唔會限住自己某個年紀結婚生小朋友，同埋呢樣嘢唔係你付出幾多努力就有幾多分收獲。」講到揀對象，子羚話會感覺行先，不過仲有少少要求，「孝順顧家好緊要，錫父母同屋企人，第時都會錫自己家庭，同埋要上進，唔係要搵好多錢，但有上進心係好，因為當有家庭又係另一樣嘢。」