早前九龍灣一間正進行裝修的店舖外圍，出現大大隻字，寫著:「不反胃通知書，申請中……」。
咁識食字搞下gag，之唔係同港人齊上齊落的「渣哥」Eric(蔡強榮)，譚小環老公的傑作！小環夫婦同心創業的小食店《渣哥一九九六》，四年間店舖由一變三，亦因是港人眼中的良心小店，故不時得到廣大市民狠狠地「懲罰」，經常大排長龍。
愛香港地道美食的渣哥，近日由小食店發展到開茶餐廳，二月初正式開張，距離開業尚有個多星期，故茶記裝修密鑼緊鼓，緊張的渣哥更日日去巡視進度。
當日所見，他由樓面、水吧到茶記外圍，統統都仔細視察。對趕工中的每個細節，他都嚴肅處理，跟裝修工人及助手開會時，那種老闆氣場相當迫人，但轉過頭對著兩個女人，渣哥就be water，眼神由凌厲180度變為柔情似水。
當日素顏小環中途現身，她帶著父母陪渣哥巡視新店進度。外母曾經為小食店坐鎮，並親自調校出皇牌魚蛋辣汁，立下大功。故當日外母駕到，渣哥把她如女神般看待，全程將她攬實四圍巡。暖男女婿，渣哥絕對是人辦。對外母的寵幸程度比老婆小環更甚，老婆唔呷醋之餘，還獲批出不反對通知書。
這半年，與港人同行的小環夫婦得人心，故巡視茶記短短半小時，已有鐵粉捉著小環索合照，之後有位中女，經過現場得悉新店是屬他倆，再望一望貼在圍板的招聘廣告，即九秒九決定見工。
一家人睇完新店裝修，便到流浮山食海鮮。壹仔上前了解茶餐廳的進度，小環說:「呢排我地成日開會，因裝修工程已接近七七八八，依家只係等裝修師傅交場。」
至於新店的鎮店皇牌菜，小環同渣哥一人一句:「我哋有個叫『打躉茶餐』。」小環說。老公補充:「仲有一個黑牛黑麵，好正呀！」即時賣花讚花香。
「我哋想開一間大家鍾意來坐，開心又好食嘅食店，所以食物質素好重要，我哋要試好啲菜式先開張。」小環續說。
屬渣哥鐵粉的男神王宗堯，之前由食客變義務店長，曾落舖坐鎮幫手，下月茶記開張，男神會否再次客串做樓面，作為賀禮？
渣哥:「你知佢正職唔係做餐飲，你要佢得閒先得嘅！開張嗰日佢一定嚟，做唔做樓面就難搞啲，佢忙嘛！」。
當日一家人食海鮮，原來是為渣哥慶祝生日，難怪外父外母齊出動。例牌菜問生日願望，渣哥說:「香港快啲冇事，快啲開心番。」壽星佬，承你貴言，壹仔在此祝你新店日日受「懲罰」，客似雲來。
【壹週刊直播平台 ChannelNEXT】
全城抗暴 區區論壇同你深度剖析
立即睇
-----------------------------
【升級壹會員登記站 為你解疑難！】
親臨旺角做升級壹會員，即送「香港人：抗爭之夏」限量明信片
詳情地址
|
鍾意就快D Share啦！
|
|
|
